Əfv olunanların tam siyahısı – burada kimlərin adı yoxdur?

Dekabrın 29-da prezident İlham Əliyev çoxdan gözlənilən əfv sərəncamı imzaladı. Əfv siyahısında beş tanınmış məhbusun adın var. Bunlar  jurnalistlər Əvəz Zeynallı, Sərdar Əlibəyli, vəkil Qurban  Məmmədov, o cümlədən NİDA Vətəndaş Hərəkatının iki üzvü  – Zaur Qurbanlı və Üzeyir Məmmədlidir.

Hazırda nəşrini dayandırmış “Xural” qəzetinin baş redaktoru olan Əvəz Zeynallı 2011-ci il oktyabrın 28-dən həbs edilib. O, 9 il müddətinə azadlıqdan məhrum olunub.

Sərdar Əlibəyli 2013-cü ilin avqustunda həbs edilib və 4 il müddətinə azadlıqdan mərhum olunub.

Qurban Məmmədov 2013-cü ildə Nəsimi Rayon Məhkəməsinin 6 dekabr tarixli hökmü ilə 3 il həbs cəzası almışdı. Zaur Qurbanlı və Üzeyir Məmmədli ötən ilin yazında daha 6 NİDA-çı ilə birgə tutulublar. Gənclər kütləvi iğtişaşları təşkil etmə cəhdində təqsirli biliniblər və 6-8 il aralığında həbs cəzaları alıblar.  Zaur Qurbanlı 8 il, Üzeyir Məmmədli 7 il müddətinə azadlıqdan məhrum edilmişdi.

İnsan Haqları üzrə Birgə İşçi Qrupunun üzvü Novella Cəfəroğlu musavat.com-a açıqlamasında əfv sərəncamını yüksək qiymətləndirdiyini bildirdi: “Bu başlanğıcdır. Biz çalışacağıq İntiqam Əliyev, Leyla Yunus, Rəsul Cəfərov, Anar Məmmədli, Bəşir Süleymanlı, Nemət Pənahlı, Xədicə İsmayıl və digərlərinin azadlığa buraxılmasına çalışaq. Çox istərdim ki, Pərviz Həşimli də azadlığa çıxsın. Yaxın aylarda onların da azadlığa buraxılması məsələsini həll etməyə çalışacağıq. Prezidentə təşəkkür edirəm. Mart ayına qədər çoxlu dəyişikliklər olacaq. Əfv sərəncamı olmadan da marta qədər azadlığa çıxma ehtimalı olanlar var. Siyahımızda olan bir çox başqa məhkumlar da azadlığa çıxıb. Mənim üçün Əvəz Zeynallı, Zaur Qurbanlı, Üzeyir Məmmədli və digərlərinin azadlığa buraxılması çox sevindiricidir. Zaur, bildiyimiz kimi, xəstə idi. Onun azad olunmasına çox sevindim. Bundan sonra da bu istiqamətdə işlərimizi davam etdirəcəyik”.

İşçi Qrupunun digər üzvü Səidə Qocamanlı qismən də olsa gözləntilərinin doğrulduğunu qeyd etdi: “Prezident artıq gözlədiyimiz əfvi imzaladı. Siyahımızdan 10 nəfər azadlığa buraxıldı. Bu birinci etap idi. Siyahımızda olan digər şəxslərin də azadlığa buraxılması məsələsinə baxılacaq. Ümid edirəm ki, yanvar ayında onların da işi müsbət həll olunacaq. Bunların hər biri insan taleyidir. Azadlığa çıxanlar üçün çox sevinirəm. Biz arzulayırdıq ki, çox adam azadlığa çıxsın. Amma ”dama-dama göl olar”. Azadlığa buraxılanlar üçün də təşəkkür etmək lazımdır. Gözləntilərimizin doğrulmadığını deməzdim. Qismən doğruldu. İşçi Qrupu fəaliyyətinə davam edəcək. Çox güman ki, bayramdan sonra Avropa Şurasının qış sessiyası ərəfəsində yenidən toplaşacağıq”.

Əfv sərəncamı ilə azadlığa buraxılan “Xural” qəzetinin baş redaktoru Əvəz Zeynallının həyat yoldaşı Məlahət Zeynallı bu xəbəri ilk dəfə bizdən eşitdiyini bildirdi. O, keçirdiyi hissləri bizimlə bölüşdü: “İnanırsınız ki, hələ də əfv olduğuna inana bilmirəm. Mən bu qərarı 1184 gün idi ki, gözləyirdim. Çox sevinirəm. Hisslərimi ifadə edə bilmirəm. Artıq 4-cü ilə keçir ki, bu xəbəri gözləyirdim. Allah bütün siyasi məhbusların qapısını açsın. Heç zaman istəmərəm ki, günahsız insanlar həbsdə olsun. Hamısına azadlıq nəsib olsun. İnsan üçün azadlıqdan dəyərli heç nə yoxdur”.

Zaur Qurbanlının atası Araz Qurbanlı sevincindən ağladı: “Sevincdən evdə hər kəs ağlayır. Yoldaşlarının buraxılmamasına təəssüflənirik. Rəşadətin körpə balası var. Digərlərinin gözləyəni var. Zaurun azad olunmasında köməyi keçən hər kəsə təşəkkür edirəm. Vəkil və jurnalistlərdən tutmuş dövlət rəhbərinə qədər. Allah digərlərinin də qapısını açsın. İnşallah, növbəti dəfə onlar da azadlığa çıxar”.

Verilən əfvdə çoxları Müsavat başqanının müavinləri Tofiq Yaqublu və Yadigar Sadıqovun, eləcə də REAL sədri İlqar Məmmədovun azadlığa buraxılacağına ümid edirdi.

Müsavat başqanı Arif Hacılı əfv sərəncamını belə dəyərləndirdi: “Dünya Azərbaycanlılarının Həmrəyliyi Günü ərəfəsində yerli və beynəlxalq təşkilatların siyasi və vicdan məhbusu elan etdiyi şəxslərin azadlığa buraxılması təbii ki, bir tərəfdən Azərbaycanın mənafelərinə uyğun olan bir addım, həm də ədalət prinsipinin qismən də olsa, bərpası kimi qəbul oluna bilərdi. Nə Azərbaycan cəmiyyəti, nə də ölkəmizdə fəaliyyət göstərən siyasi qüvvələr, ictimai birliklər daha çox siyasi əqidəsinə görə həbs edilən məhbusun bayram günü ərəfəsində azadlığa çıxacağına ümid bəsləyirdi. Təəssüf ki, ümidlər doğrulmadı. Hakimiyyət dairələri yenə də ölkədə vətəndaş həmrəyliyinə nail olmaq imkanlarını itirdilər”.

Müsavat başqanı Avropa Şurası Nazirlər Komitəsinin REAL sədri İlqar Məmmədovla bağlı qərarına ölkə iqtidarının məhəl qoymamasına da toxundu: “Azərbaycan hakimiyyəti beynəlxalq təşkilatlar qarşısında götürdüyü öhdəlikləri yerinə yetirmir. Beynəlxalq birliyə qarşı açıq meydan oxuyan siyasət həyata keçirir. Bu da hesab edirəm ki, Azərbaycanın milli mənafelərinə ziddir. Təəssüf ki, Azərbaycan hakimiyyəti bu istiqamətdəki siyasətinə düzəliş etmək əvəzinə, beynəlxalq aləmdə daha radikal mövqelər tutmaqla ölkəmizə problemlər yaratmaqda davam edir”.