Niyaməddin Orduxanlı: “O, bütün imkanlarını işə salıb ki, hakimiyyətin xoşuna gəlsin və bununla da 
hakimiyyət onunla yenidən əməkdaşlıq etməyə başlasın”
Bütöv Azərbaycan Xalq Cəbhəsi Partiyasının sədrinin ictimai və siyasi məsələlər üzrə müavini Niyaməddin Orduxanlı mətbuata müsahibə verib. Müsahibədəki bir sıra iddia və tezislər maraq doğurdu. Ona görə də həmin müsahibəni müəyyən ixtisarlarla təqdim edirik.
-Niyaməddin bəy, Milli Şuranın son aksiyalarını necə xarakterizə edərdiniz?
-Sözün acığı bu mitinqdən çox Əli Kərimlinin hakimiyyətə yarınmağına xidmət etmiş addımıdır. Bəzi beynəlxalq təşkilatlar iddia edirlər ki, Azərbaycanda söz azadlığı, sərbəst toplaşmaq azadlığında problem yaranıb. Hakimiyyət də həmin dairələrə göstərir ki, baxın, bu da radikal müxalifətin sərbəst toplaşmaq azadlığının təminatı və bura gələn adamların sayı da yüzlərlədir. Bu qədər sadə. Digər tərəfdən, bu gün iqtidar çox məharətlə Əli Kərimlidən faydalanır. Hakimiyyət çox marağındadır ki, radikal müxalifətin başında Əli Kərimli dayansın. Ona görə ki, onun xarakterini, onunla necə davranmağı, necə işləməyi yaxşı bilirlər. Hakimiyyət istəyir ki, Qərb də Əli Kərimlini radikal müxalifətin əsas təmsilçisi kimi qəbul eləsin. Soruşa bilərsiniz ki, niyə? Azərbaycanda özünə hörmət edən ciddi bir siyasətçi Əli Kərimliyə güvənib, inanıb ciddi siyasi ortaqlıq qurmaz. Və bu gün onun yanında olan adamlara baxın. Bir ciddi adam qalıb, Əli Kərimlinin yanında?! Onu az-çox tanıyan adam dərhal ondan uzaqlaşır. Azərbaycan xalqı da heç vaxt Əli Kərimli kimi bir adamı siyasi lider kimi qəbul etməz və onun arxasınca getməz. Ona görə də hökumətə tam sərf edir ki, bu düşərgənin başında Əli Kərimli dayansın. Əli Kərimlinin özü də bunu çox yaxşı başa düşür. Və buna görə də hakimiyyətin maraqlarına uyğun açıqlamalar verir, mövqe sərgiləyir. Bilə-bilə ki, mitinqə 300-500-dən artıq gələn olmayacaq. Bu mitinqlərin keçirilməsi hakimiyyətə lazımdır.
Əli Kərimli çox yaxşı bilir ki, bunun mitinq adı ilə keçirdiyi şouya gələnlərin sayı demək olar ki, çox az olacaq. Bunun məqsədi mitinqə gələnlərin kütləviliyinin təmin edilməsi deyil. Kimdir onun mitinqinə gələn? Artıq Azərbaycanın Avropa Şurası Nazirlər Komitəsinə sədrlik müddəti bitir və Azərbaycanda sərbəst toplaşmaq azadlığı tam təmin edilir. Kim bundan sonra Azərbaycana hansı iradı bildirə bilər?
-Aksiyaya İsa Qəmbərin qatılmaması Müsavatla AXCP arasında hələ də soyuq savaşın davam etməsindən xəbər vermirmi?
-İsa Qəmbərlə Əli Kərimli arasında savaşın 22 illik tarixi var. Bu adamlar nə vaxt yaxınlaşıb ki? Bu gün Əli Kərimlinin İsa Qəmbərə etdiyi nifrət patolojidir. Həm də Əli Kərimli çox sistemli şəkildə Müsavat Partiyasına və “Yeni Müsavat” qəzetinə hücum edir. Bunu hamı görür. Bu hücumlar təkcə ona görə deyil ki, Əli Kərimli və onun ətrafı Müsavatı özlərinə rəqib görürlər. O, iqtidara xoş gəlmək üçün bunu edir. Və qəsdən bu hücumları təşkil edir.
-Aksiyaya islamçıların da cəlb edilməsi AXCP-nin din adamlarından yararlanmaq cəhdi deyilmi?
-Əli Kərimli elə bir adamdır ki, hətta İŞİD terror qruplaşmasının üzvləri ilə də siyasi ittifaq bağlaya bilər. Bunun üçün heç bir fərqi yoxdur.
– “Siyasi məhbuslara” azadlıq tələb edən mitinqçilərin erməni əsirliyində olan vətəndaşlarımız barədə bir cümlə belə işlətməməsi nə dərəcədə məntiqli və normaldır?
-Bunu necə edə bilərdilər ki? Əli Kərimli yaxşı bilir ki, həmin əsirlikdə olan vətəndaşlarımızla bağlı ABŞ-ın rəsmi mövqeyi yaxşı deyil. Demək olar ki, ABŞ ermənilərin maraqlarına cavab verəcək bir mövqe sərgiləyir. Əli Kərimli də qəsdən özünü eşitməməzliyə vurur. Guya bunun yadına düşmür. Əli Kərimli yaxşı bilir ki, mitinqdə bu cür çıxışla ABŞ-ın böyük qəzəbinə tuş gələ bilər. Əsas Kərimlinin siyasi maraqlarıdır. Onun üçün kimin hansı əsirlikdə olduğunun heç bir faydası yoxdur. Bu məsələ ilə bağlı çox böyük işlər görən hörmətli millət vəkillərimizdən biri olan Sahib Alıyev mətbuatda, sosial mediada, facebookda haqlı irad bildirdi və bunu qətiyyətsizlik kimi xarakterizə etdi. Əli Kərimli sanki bu iradı “eşitmir” və “görmür”…
– Ümumiyyətlə, son zamanlar AXCP-nin fəallaşması və mitinqlər keçirməklə gündəmə gəlmək cəhdi sizcə xaricdən gəlmiş bir tapşırıqdır, yoxsa bu partiya radikal düşərgədə öncüllüyü ələ almaq istəyir?
– Bütün baş verənlərin bir səbəbi var: Əli Kərimli bütün imkanlarını işə salıb ki, hakimiyyətin xoşuna gəlsin və bununla da hakimiyyət onunla yenidən əməkdaşlıq etməyə başlasın. Deyəsən, artıq Qərb dairələri də Əli Kərimlinin bu niyyətindən xəbər tutublar. (musavat.com)
