Prezident İlham Əliyevin Berlində erməni silahlı birləşmələrinin Xocalıda törətdikləri soyqırımı xatırlatması təsadüfi deyildi.
Bu sözləri politoloq Elxan Şahinoğlu Prezident İlham Əliyevin Berlin səfərini şərh edərkən deyib. Siyasi şərhçi öncə Merkelin Qarabağ açıqlamasına diqqət çəkib:
“Almaniya təhlükəsizlik konsepsiyasında Rusiyanı strateji tərəfdaş statusundan rəqib statusuna keçirib. Berlinin bu qərarı Ukrayna böhranı, Krımın işğalı və Rusiyanın Donbas separatçılarına verdiyi dəstəyə görədir. Merkel Rusiyanın Dağlıq Qarabağ münaqişəsinin həllindəki rolunu qabartmaqla, əslində, bu mesajı verdi: “Avropanın problemi onsuz da kifayət qədərdir, Dağlıq Qarabağ probleminin həlli ilə məşğul olmağa vaxt yoxdur”.
Politoloq Almaniya kanslerinin Ankara-İrəvan dialoqu ilə bağlı fikirlərinə də aydınlıq gətirib:
“Merkel Türkiyənin Almaniya parlamentinin “erməni soyqırımı” qətnaməsinə sərt reaksiyasını anlamadığını və Türkiyə ilə Ermənistan arasındakı dialoqun genişlənməsi üçün əlindən gələni edəcəyini açıqladı. Merkelin hər iki açıqlaması Türkiyə ilə yanaşı, Azərbaycanın da maraqlarının əleyhinədir. Deməli, o da “erməni soyqrımının” tanınmasının tərəfdarıdır. Azərbaycan torpaqları işğaldan azad olunmayana qədər Ankara-İrəvan dialoqu mümkün deyil. Ankaranın bu mövqeyi Berlinə məlumdur. Prezident İlham Əliyevin Berlində erməni silahlı birləşmələrinin Xocalıda törətdikləri soyqırımı xatırlatması isə təsadüfi deyildi. Prezident bununla Almaniya parlamentinin “erməni soyqırımını” tanıması qərarına etirazını nümayiş etdirdi”.
Qeyd edək ki, Prezident İlham Əliyev iyunun 7-də Almaniyaya rəsmi səfər edib.
