Səudiyyə Ərəbistanı, Küveyt və Yəmənlə yanaşı, Ərəb Parlament İttifaqı və Körfəz Əməkdaşlıq Şurası İsveçin paytaxtı Stokholmda məscid qarşısında Qurani-Kərimin yandırılmasını pisləyib.
Elchi.az xəbər verir ki, Səudiyyə Ərəbistanı Xarici İşlər Nazirliyinin bəyanatında, bu dəfələrlə təkrarlanan iyrənc hərəkətlərin səbəbindən asılı olmayaraq qəbuledilməz olduğu və bu davranışların nifrət, irqçilik və təcrid olunma hallarına yol açdığı bildirilib.
Küveyt Xarici İşlər Nazirliyi hadisəni bütün dünya müsəlmanlarının hisslərini alovlandıracaq təhlükəli və təxribat xarakterli addım kimi qiymətləndirərək, beynəlxalq ictimaiyyəti və İsveç hökumətini nifrət və təəssübkeşlik hisslərinin aradan qaldırılması üçün təcili tədbirlər görməyə çağırıb.
Yəmən Xarici İşlər Nazirliyinin bəyanatında qeyd olunub ki, mənfur ekstremist hərəkat tərəfindən islami müqəddəs münasibətlər prosesində dünya müsəlmanlarının hisslərini qəsdən təhrik etməsi və bu hərəkəti təşviq edənlərin hamısı cavab verməlidir.
Nazirlik tolerantlıq dəyərlərinə inanmayan və nifrət mədəniyyətini hədəf alan bu cür təqiblərin qarşısının alınması üçün tədbirlər görülməsinə çağırıb.
Fələstin Xarici İşlər Nazirliyindən verilən açıqlamada, mənfur ekstremist tərəfindən Qurana qarşı edilən bu hücumun nifrət və irqçiliyin açıq ifadəsi, tolerantlıq, demokratiya və dinin qəbulu dəyərlərinə açıq hücum olduğu qeyd edilib.
Sözügedən hərəkətin fikir və ifadə azadlığı ilə ziddiyyət təşkil etdiyi bildirilən açıqlamada, bunun dünyada milyonlarla müsəlmanın hisslərinə toxunduğu vurğulanıb.
Ərəb Parlament İttifaqı da edilənlərin dünya müsəlmanları üçün təxribat xarakterli hərəkət olduğunu bəyan edərək, “İsveç hakimiyyətinin bu cür təxribatçı hərəkətlərinin davam etməsini” pisləyib.
Livandakı Ali İslam Şiə Şurası hadisəni İslam ümmətinə qarşı hücum, din və etiqad azadlığının açıq şəkildə pozulması kimi qiymətləndirib.
İsveçin paytaxtı Stokholmda İraq əsilli Salvan Momika adlı şəxs dünən Stokholm məscidinin qarşısında polisin mühafizəsi altında Quranı yandırıb.
Nuranə Məmmədova
