Bakı Ağır Cinayətlər Məhkəməsində, AzTV sədri Arif Alışanova qarşı sui-qəsddə təqsirləndirilən Şücaət Əkbərov, Qoçalı Cəbiyevin, Zöhrab Şirinovun, Aqşin Hüseynovun barələrindəki cinayət işi üzrə məhkəmə davam edib.
APA-nın xəbərinə görə, hakim Əfqan Hacıyevin sədrliyi ilə keçirilən prosesdə Şücaət Əkbərovun vəkili texniki vasitələrdən istifadə olunamaqla Arif Alışanov və qızı Nigar Alışanovun dindirməsini istəyib.
Vəkil həmçinin digər vəsatətində Şücaət Əkbərov barəsində məhkəmə tibbi ekspertizanın keçirilməsini və səhhətinin həbsdə qalmasına imkan verib-vermədiyinin müəyyən edilməsini istəyib.
Məhkəmə vəsatətləri təmin etməyib.
Təqsirləndirilən Şücaət Əkbərovun vəkili məhkəməyə siyahı təqdim edərək siyahıda olan şəxslərin əlavə şahid qismində məhkəmədə dindirilməsini istəyib.
Bu vəsatət də təmin olunmayıb.
Şücaət Əkbərovun digər vəkili isə müvəkkili barəsində verilən 178-ci(dələduzluq)maddəsi üzrə məhkəmə texniki mühasibatlıq ekspertizasının keçirilməsini istəyib.
Bu vəsatət də təmin edilməyib.
Təqsirləndirilən Qoçəli Cəbiyev çıxışında hakimi təhqir etdiyindən məhkəmə zalından uzaqlaşdırılıb.
Prosesdə məhkəmə istintaqının başa çatdığı elan olunub.
Prokuror çıxış üçün məhkəmədən vaxt istəyib.
Qeyd edək ki, təqsirləndirilən şəxslər Cinayət Məcəlləsinin 29,120-ci (qəsdən adam öldürməyə cəhd), 178-ci (dələduzluq) və digər maddələrinə əsasən ittiham olunurlar.
