“Yeni Sabah” xəbər verir ki, o öz müraciətində kitabının əsassız olaraq qadağan edilməsindən, məzhəbpərəst ekspertin verdiyi qərəzli rəyindən bəhs edib. E. Miri kitabında 7 mövzunun əks olunduğunu bunların hər birinin insanları mövhumatdan, xurafatdan aydınlığa dəvət etdiyini vurğulayıb.
E. Miri kitabında İslamda ölüyə Quran oxumağın, azyaşlı qızların ərə verilməsinin, müvəqqəti nikah kimi təqdim olunan siğənin, sehrin, cadunun, kişilərə veriləcəyi iddia edilən huri anlayışının, seyyidlərin və peyğəmbərlərin günahsızlığının olmadığını Qurana əsaslanaraq yazdığını bildirdiyi kitabının yasaqlanmasına 1 saylı Bakı İnzibati-İqtisadi Məhkəməsinin hakimi Aygün Abdullayevanın haqq qazandırdığını və Bakı Apellyasiya Məhkəməsinin hakimlərinin həmin ədalətsizliyi qüvvədə saxladıqlarını bildirib.
O, prezidentdən problemin həlli üçün komitəyə tapşırıq verməsini xahiş edib.
