Ermənistanın baş naziri Nikol Paşinyan bildirib ki, ölkədə koronavirusa görə tətbiq edilmiş fövqəladə vəziyyət rejimi uzadılacaq.
Bu barədə “Report” RİA “Novosti”yə istinadən xəbər verir.
“Fövqəladə vəziyyət rejimi müddətinin uzadılması ehtimalı var və bu ehtimal kifayət qədər yüksəkdir. Düşünürəm ki, fövqəladə vəziyyət uzadılacaq”, – baş nazir bildirib.
Son məlumatlara görə, ölkədə daha 350nəfərdə koronavirus aşkarlanıb. Bununla da virusa yoluxanların sayı 13 675-ə yüksəlib.
Pandemiyadan ölənlərin sayı daha 6 nəfər artaraq 217-yə çatıb. Hazırda Ermənistanda 8 943 aktiv koronavirus xəstəsi var.
Ermənistanda fövqəladə vəziyyət rejimi iyunun 13-ə qədər qüvvədədir.
Daha əvvəl bildirilib ki, Paşinyan özü də koronavirus infeksiyasından sağalıb.
