Bakı şəhəri Sabunçu rayonu, Zabrat qəsəbəsi sakinləri şikayət edirlər. 
Sakinlərin şikayəti Zabrat-Maştağa yolunun qəsəbədən keçən hissəsinə görədir. Həmin yoldan piyadaların keçməsi üçün heç bir şəraitin olmaması və buna görə də, bir neçə nəfərin həyatını itirməsi, sakinləri qəzəbləndirib.
Qəsəbə sakinləri iki il öncə yolu bağlayaraq öz etirazlarını bildirmişdilər. Aksiyaya səbəb isə, yolu keçən bir şagirdi avtomobilin vurması olmuşdu. Həmin tarixdə yolu bağlayan qəsəbə sakinlərinə ən qısa zamanda bu problemin həll ediləcəyini desələr də, problem olduğu kimi qalır.
Sakinlərin şikayəti əsasında qəsəbəyə yollandıq. Sakinlərin şikayət etdikləri yolu keçməli olduq. Amma bunun üçün bizə 10-15 dəqiqə vaxt tələb olundu. Çünki keçid yox idi. Avtomobillər də sıx hərəkət etdiyi üçün gözləməli olduq. Yolu keçərkən isə qaçmaq vacib idi.
Qəsəbə sakinləri ilə görüşdük. Hər kəs adı çəkilən yoldan şikayət edirdi.
Kəndin ağsaqqalı deyir ki, məktəbə gedən uşaqlara görə çox narahatdırlar: “Yolun o biri tərəfində 71 və 75 nömrəli məktəblər var. Qəsəbənin uşaqları həmin məktəblərdə oxuyurlar. Məktəbə getmək üçün gərək yolu keçsinlər. Yolda da keçid, işıqfor, zolaq yoxdur. Maşınlar çox vaxt saxlamırlar. Nəvəm məktəbə gedəndə bütün fikrim onda qalır. Mən yaşlı adamam. Qaça-qaça getmək mənlik deyil. Ona görə də, kimsə mənə kömək etməsə, mən o yolu keçə bilmirəm. Dəfələrlə şikayət eləmişik ki, gəlib ya keçid, ya da işıqfor qoysunlar. Hər dəfə həll edəcəklərini deyirlər. Amma neçə ildir ki, heç nə düzəlməyib. Bir daha xahiş edirik ki, bizim problemimizi həll etsinlər”.
“Bir neçə gün öncə 2 məktəblini maşın vurdu”
Zabrat sakini Fərhad Qafarovun sözlərinə görə, bu vaxta qədər dəfələrlə bu yol ucbatından ölənlər və ağır xəsarət alanlar olub: “Mən bu qəsəbədə doğulmuşam, burada böyümüşəm. Neçə ildir ki, biz bu problemlə üz-üzəyik. Bir neçə gün öncə 2 məktəblini maşın vurdu. Xoşbəxtlikdən ağır xəsarət almadılar. Sürücü əyləci vaxtında sıxa bildi. Biz hər an ölüm təhlükəsi yaşayırıq. Xahiş edirik ki, bizə köməklik göstərsinlər. Bu yola bir keçid və ya işıqfor qoysunlar”.
“Daha bezmişik”
Qəsəbə sakinlərindən biri olan Ədilə Şirinova deyir ki, hər dəfə yolu keçmək istəyəndə ölümlə burun-buruna gəlirlər: “Hamının nəvəsi məktəbdə oxuyur. Hamı işindən-gücündən olub, uşaqlarını məktəbə aparırlar. Daha bezmişik. Yolu keçə bilmirik. Hər dəfə yolu keçmək istəyəndə ölümlə burun-buruna gəlirik. Yaxınlıqda zavod var. Bir az irəlidə bağlar var. Əsas yollardan biri də bu yoldur. Hər gün minlərlə maşın keçir bu yoldan… Yekə KAMazlar, tırlar bu yoldan istifadə edirlər. Balaca maşınlar qarşısına adam çıxanda əyləci sıxa bilər, amma iri tutumlu maşınlar bunu bacarmayacaq. Əzib keçəcək. Bir neçə dəfə də bu, olub. Nə vaxta kimi belə olacaq? Xəstə, yaşlı insanlar var. Onları da nəzərə almalıdırlar, ya yox ?”
“Kim burada keçid və ya işıqfor qoydura bilsə, ona səs verəcəyik”
Sakinlər tələb edirlər ki, ən qısa zamanda bu yolda keçid tikilsin. Olmasa, yolu bağlayacaqlar: “2 il öncə bu yolu bağlamışdıq. Lazım gəlsə, yenə bağlayacağıq. Haqqımızı bir yolla tələb etməliyik. Səsimizi dövlət orqanlarına eşitdirməliyik. Bu yola ən qısa zamanda keçid və ya işıqfor qoyulmasa, yolu yenə bağlayacağıq. Qarşıdan bələdiyyə seçkiləri gəlir. Gəlib, bizə boş yerə vəd verməsinlər. Kim burada keçid və ya işıqfor qoydura bilsə, ona səs verəcəyik. Çünki bizim neçə illik problemimizi həll etmiş olacaq”.
Məhəmməd TÜRKMƏN
Fotolar və video müəllifindir.
