“City Hospital”ın direktoru Bayram Qorçuyevin oğlu Cavidan Qorçuyev və onun idmançı dostları tərəfindən döyülərək ağır bıçaq xəsarətləri ilə xəstəxanaya yerləşdirilən Aslan və Azər Cəfərov qardaşlarının istintaqının gedişindən narazılığı onlara artıq problem yaratmağa başlayır.
Qeyd edək ki, Cəfərov qardaşları bir müddət öncə virtualaz.org saytının redaksiyasına müraciət edərək döyülmələri və bıçaqlanmaları faktının hələ də lazımınca araşdırılmamasından şikayətlənmişdilər.
Vəkil Akif Əlizadə isə bu gün virtualaz.org saytına açıqlama verərək zərərçəkən Azər Cəfərovun şübhəli şəxs qismində saxlanıldığını dedi: “Dünən müstəntiq Tural Hacıyev zərərçəkən şəxslərdən birini – Azər Cəfərovu çağırıb dindirdi. Dindirilmədən dərhal sonra onu şübhəli şəxs kimi saxladılar. Guya hadisə zamanı Azər Cəfərov qardaşı Aslan Cəfərovla birlikdə təqsirləndirilən Cavidan Qorçuyevə qarşı xuliqanlıq cinayəti törədiblər, qəsdən bədənə az ağır xəsarət yetiriblər. Əslində isə belə bir şey olmayıb. Əksinə, qarşı tərəf idmançı olan şəxslərlə birlikdə bu qardaşları döyüblər. Həm də hadisə zamanı Azər Cəfərov ölümcül vəziyyətdə xəstəxanaya yerləşdirilib, əməliyyat olunub. Həkimlərin səyi nəticəsində onu həyata qaytarmaq mümkün olub”.
Vəkilin sözlərinə görə, müstəntiq Tural Hacıyev ona zəng vuraraq Azər Cəfərovun məhkəməyə aparılacağını deyib: “Azər Cəfərov bu gün məhkəməyə aparılacaq. Onun barəsində Cinayət Məcəlləsinin 221.2.3 (xuliqanlıq) və 127.2.3-cü (qəsdən sağlamlığa az ağır zərər vurma) maddəsi ilə ittiham irəli sürülüb. Barəsində həbs-qətimkan tədbiri seçiləcəyi gözlənilir”.
Zərərçəkmişlərin vəkili Aslan İsmayılov virtualaz.org saytınaaçıqlamasında zərərçəkənlərlə cinayətkar kimi davrandıqlarını, hal-hazırda bu ağır cinayəti kimlərinsə sifarişi ilə ört-basdır etməyə çalışdıqlarını demişdi.
Qeyd edək ki, sözügedən cinayət hadisəsi bu il avqust ayının 5-də Xətai rayonu, Nəsrəddin Tusi küçəsi, 19 saylı binanın qarşısında baş verib. Hadisə zamanı 1977-ci il təvəllüdlü Azər Cəfərov, onun qardaşı, 1986-cı il təvəllüdlü Aslan Cəfərov və 1970-ci il təvəllüdlü Telman Nuriyev döyülərək bıçaqlanıblar. Yaralılar ağır vəziyyətdə xəstəxanaya yerləşdiriblər.
