Yəmənin “Əl Təməniyə Əl Yom” qəzetində “Azərbaycanın işğaldan azad edilmiş əraziləri “yaşıl enerji” zonasına çevriləcək” sərlövhəli xəbər dərc olunub.
Elchi.az xəbər verir ki, yazıda Azərbaycanın İqtisadiyyat naziri Mikayıl Cabbarovun azad edilmiş ərazilərin “yaşıl enerji” zonasına çevrilməsi və yerli resurslardan səmərəli istifadənin əsas prioritetlərdən olduğu ilə bağlı çıxışı yer alıb.
Bundan başqa məqalədə nazirin “Ağdam Sənaye Parkının ərazisinin işıqlandırılmasında yerli istehsal olan günəş panellərindən istifadə edilir”, cümləsi də qeyd olunub.
Yazıda vurğulanıb ki, artıq işğaldan azad edilmiş Ağdam Sənaye Parkının sosial zonasının təşkili yekunlaşıb, burada rezidentlər üçün konteyner tipli ofis, yataqxana, tibb məntəqəsi, mağaza, aptek və yeməkxana yaradılıb, əraziyə asfalt yol çəkilib, abadlıq işləri aparılıb.
