Əvvəlcədən xarici və daxildəki qruplar tərəfindən hazırlanmış təxribatçılar Qazaxıstan dövlətçiliyini zəiflətməyi qarşılarına məqsəd qoyublar. Yayılan kadrlardan da görünür ki, hazırlanmış təxribatçı qruplar polis, təcili yardım maşınlarını hansı hala salırlar.
Bu sözləri Bakı Politoloqlar Klubunun sədri Zaur Məmmədov Qazaxıstanda baş verən etiraz aksiyaları barədə danışarkən deyib.
“Görünən odur ki, Qazaxıstan hakimiyyətinin qərarları bəzi qonşu dövlətlərin xoşuna gəlmir. Xatırladım ki, son illər ərzində Qazaxıstanda dövlətçiliyin inkişafı üçün ciddi addımlar atılıb. Bu isə daxildə və xaricdəki müxtəlif qrupların xoşuna gəlmir. Son 1 ildə Türkiyə və Qazaxıstan arasında müdafiə və siyasi sahələrdə əldə olunan razılıqlar, Türk Dövlətləri Təşkilatındakı aktivlik və s. ciddi addımlar atılıb. Ən son isə Tokayevin yeni il ərəfəsində verdiyi qərar… Artıq 2 ildir ki, bəzi dairələr Qazaxıstanın onlar tərəfindən yaradıldığını açıq-aşkar dilə gətirirdilər”, – politoloq bildirib.
Z.Məmmədovun fikrincə, Qazaxıstanda baş verənlər diqqətlə izlənilməlidir:
“Heç kim hansısa etnik qrupları qorumaq bəhanəsi ilə qonşu dövlətin sərhədlərini keçə bilməz. Qazaxıstan türk dünyasının vacib dövlətidir və orada baş verənlər dövlətçiliyin zəifləməsi məqsədini güdür”.
