Böyük Britaniyanın xarici işlər naziri Liz Tras Moskvaya Rusiyanı Ukraynadakı vəziyyətlə bağlı diplomatik yolla getməyə çağırmaq üçün gəldiyini bildirib.
Elchi.az-ın verdiyi məlumata görə, bunu britaniyalı nazir Rusiya xarici işlər naziri Sergey Lavrovla danışıqlarının protokol hissəsində çıxışında bildirib.
“Reallıq ondan ibarətdir ki, biz Ukraynanın suverenliyinə və ərazi bütövlüyünə xələl gətirmək məqsədilə Ukrayna ilə sərhəddə 100 mindən çox hərbçinin toplanmasına göz yuma bilmərik. Ukraynada müharibə ruslar, ukraynalılar və Avropanın təhlükəsizliyi üçün fəlakət olacaq. Ancaq alternativ yol var – münaqişə və qan tökülməsinin qarşısını almağa kömək edəcək diplomatiya yolu… Mən Təhlükəsizlik Şurasının üzvü kimi Rusiyanı bu yolla getməyə çağırmaq üçün buradayam”, – deyə Britaniya XİN başçısı vurğulayıb.
