Baş prokuror yanında Korrupsiyaya qarşı Mübarizə Baş İdarəsinin əməliyyat qurumları tərəfindən ötən il aşkar edilən cinayət faktları üzrə 118 cinayət işi başlanılıb.
Elchi.az xəbər verir ki, bu, Nazirlər Kabinetinin 2021-ci il üçün hesabatında qeyd olunub.
Keçirilən 55 əməliyyat tədbiri nəticəsində korrupsiya cinayəti törədən 73 şəxs cinayət başında yaxalanıb, habelə axtarışda olan 13 nəfər saxlanılıb.
Hesabat dövründə Baş idarə tərəfindən 493 şəxs barəsində 301 cinayət işinin ibtidai istintaqı tamamlanıb, onlardan 466 şəxs barəsində 274 cinayət işi baxılması üçün məhkəmələrə göndərilib.
Həmin işlərdən 12 hüquqi şəxs barəsində cinayət hüquqi tədbirlərin tətbiq edilməsi üzrə məhkəməyədək icraat aparılaraq, hüquqi şəxslər və onların rəhbərləri məhkəmə məsuliyyətinə verilib. Məhkəmələrə göndərilən cinayət işlərinin əksəriyyəti üzrə ittiham hökmləri çıxarılıb, qalanları isə məhkəmə baxışındadır.
İstintaqı tamamlanmış cinayət işlərindən 306 şəxs barəsində 155 iş ağır cinayətlər məhkəmələrinə, 7 şəxs barəsində 3 iş hərbi, 153 şəxs barəsində 116 cinayət işi isə rayon (şəhər) məhkəmələrinə göndərilib.
