ABŞ-da türk restoranına basqın edib, azərbaycanlıları ölümlə hədələyən ermənilərə hökm oxunub.
Elchi.az “Anadolu”ya istinadən xəbər verir ki, 2020-ci il noyabrın 4-də Nyu Yorkda Beverly Hills ərazisində yerləşən “İstanbul Cafe”yə hücum edərək orada xuliqanlıq edən ermənilər – 23 yaşlı Uilyam Stepanyan 5 il və 24 yaşlı Harutyun Harri Çalikyan 15 ay müddətinə azadlıqdan məhrum ediliblər.
Bundan başqa, təqsirləndirilən şəxslər restorana vurduqları maddi ziyana görə isə 21 200 dollar məbləğində cərimələniblər.
Qeyd edək ki, 2020-ci il noyabrın 4-də Beverly Hills ərazisində yerləşən “İstanbul Cafe” adlı restorana gələn 6-8 nəfərlik qrup restorandakı insanlara hücum edərək ətrafa ziyan vurub.
20-30 yaşları arasında olduğu təxmin edilən bir qrup şəxsin restoran işçilərinə hücum etdiyi, iş yerindəki mebel, kompüter və digər əşyaları sındırdığı təhlükəsizlik kamerasına düşüb.
Restoranın sahibi və işçiləri hücum edənlərin erməni dilində danışdıqlarını, Türkiyə və Azərbaycan xalqlarını da ölümlə hədələyərək təhqir etdiklərini bildiriblər.
Stepanyan və Çalikyan daha sonra hücumu təhrik etməkdə və həyata keçirməkdə ittiham edilərək saxlanılıblar.
İttiham aktında qeyd edilib ki, hücum zamanı bir neçə nəfər yaralanıb.
