“The New York Times” qəzeti bir əsrdən sonra ilk dəfə Rusiyadakı bütün müxbirlərini ölkədən çıxarır.
Elchi.az-ın CNN-ə istinadən xəbərinə görə, qəzet hazırda Rusiyada heç bir müxbirinin qalmayacağını bəyan edib.
““The New York Times”ın Moskva tarixi üçün çox kədərli bir gündür. Bütün müxbirlər ölkədən çıxarılır. Bizim 1921-ci ildən bəri bir və ya iki viza çətinlikləri istisna olmaqla, davamlı şəkildə orada reportyorlarımız olub. Nə Stalin, nə “soyuq müharibə” bizi ölkədən çıxarb”, – deyə qəzetin Moskva bürosunun keçmiş rəhbəri Neil MakFarkuar bildirib.
Qəzetin Rusiyanı rəsmi şəkildə tərk etməsinin səbəbi kimi ölkənin yeni qanunvericiliyi göstərilib. “The New York Times”ın mətbuat katibi Danielle Roades Ha bildirib ki, yeni qanun Ukrayna müharibəsi ilə bağlı müstəqil, dəqiq jurnalist fəaliyyətini kriminallaşdırmaq məqsədi daşıyır, bu səbəbdən qəzetin bölgədəki redaksiya heyəti təhlükəsizlik məqsədi ilə ölkədən çıxarılır.
