“Rəsmi Bakı əgər Ermənistanla sülh müqaviləsi imzalanandan sonra regionda tədricən əmin-amanlıq olacağını, bütün problemlərin həll olunacağını və iki dövlət arasında qarşılıqlı müsbət əlaqələrin qurulacağını fikirləşirsə, bu fikrindən daşınmalıdır”.
Bu fikirləri Elchi.az-a açıqlamasında politoloq Azər Qasımov deyib.
Onun sözlərinə görə, sülhdən danışan Azərbaycan rəsmilərinin ritorikası və hərəkətləri arasındakı ziddiyət onların sülh məsələsinin qeyri-mümkünlüyünü dərk etdiyini isbat edir:
“Son “Qisas” əməliyyatı bunun sübutudur. Azərbaycan dövləti qarşı tərəfi güc yolu ilə öz imzasına sahib çıxmağa məcbur edir.
Güc tətbiq edilməklə gəlinmək istənilən bir nəticə, davamlı və qalıcı sülhə nail olunmasına şərait yaradan yol deyildir. Bu, olsa-olsa, müvəqqəti sülhə məcbur etməkdir ki, bu da “sülh” məvhumuna zidd anlayışdır”.
A.Qasımov qeyd edib ki, Azərbaycan dövləti Ermənistanı sülhə məcbur etməyə deyil, imza atdığı müqavilənin şərtlərinə əməl etməyə məcbur etməlidir:
“Bu, ən maksimal gəlinə biləcək nəticə olmalıdır. Bundan artığı Azərbaycan dövləti üçün lazımsız, hətta gələcəyə yönəlik planlar üçün zərərli addım olardı.
Sərhədlərin tam şəkildə müəyyən edilməsi və son nəticə olaraq, iki dövlət arasında saxta sülh müqaviləsi imzalanmasından ən çox Azərbaycan ziyanlı çıxar. Ermənistanla sülh müqaviləsiz ən pis şərait indikindən fərqli olmayacaq ki, bu da bizə sərf edən, qarşı tərəfi isə daha da zəiflədən faktordur.
Azərbaycan regionun böyük dövlətlərinin məntiqi ilə düşünmək praktikasını tətbiq etməlidir. İran və Rusiya necə ki, özlərinin rəqiblərini daim problem içərisində saxlamaq siyasətini yürüdür, Azərbaycan da bu praktikadan istifadə etməlidir”.
Yeganə
