Putinin Türkiyəyə təklifi inamdan irəli gəlir

Ukrayna böhranı başlamazdan əvvəl Türkiyə Rusiya üçün mühüm qaz tərəfdaşı sayılırdı. Çatdırılmalar Qara dənizin dibi ilə “Mavi axın” qaz kəməri ilə həyata keçirilirdi. Lakin 2022-ci ilin fevralından sonra Ankaranın əhəmiyyəti xeyli artıb. Türkiyə Bolqarıstanı alıcı və vasitəçi kimi əvəzləyərək, Sofiya və Avropa Komissiyasının rədd etdiyi “Cənub axını”nı əvəz etmək üçün “Türk axını”nın tikintisinə razılıq verdi.
Elchi.az xəbər verir ki, bu barədə “Vestnik Qafqaza” məlumat yayıb.
“Rusiya-Ukrayna müharibəsi başladıqdan sonra rus qazının əsas alıcısı olan Avropa ondan qurtulmaq istəyini bəyan edib. Bunun fonunda “Türk axını” ilə təchizat fasiləsiz olaraq davam edir. Türkiyə Rusiyaya qarşı sanksiyalar tətbiq etmək barədə düşünmür. Üstəlik, Türkiyə Rusiya qazının yenidən satışı üçün mərkəzə çevrilə bilər. Astanada Ərdoğanla danışıqlar zamanı Putin Türkiyəni etibarlı tərəfdaş adlandırıb və onun ərazisində siyasi çalarsız fəaliyyət göstərəcək qaz qovşağı yaratmağı təklif edib.
Ukrayna ilə bağlı işlər daha mürəkkəbdir. Münaqişənin ilk həftələrindən Türkiyə vasitəçiliyə və onun həllinə kömək etməyə çalışır. Ərdoğan mütəmadi olaraq Putinlə Zelenski arasında görüşün təşəbbüskarıdır. Lakin Ukrayna və Rusiya nümayəndə heyətləri səviyyəsində İstanbul görüşündən kənara çıxmaq hələlik mümkün olmayıb. Amma Türkiyə lideri təslim olmur. Astana sammitində Ərdoğan növbəti dəfə münaqişəyə ədalətli son qoymağa çağırıb. Ərdoğan bütün çətinliklərə baxmayaraq, nizamlanma üçün diplomatik rıçaqların mövcudluğuna inanır. Putinin sülh danışıqlarına hazır olması ilə bağlı çıxışından sonra Ərdoğanın manevr imkanları genişlənib. İndi o, deyə bilər ki, “Rusiya sülh istəyir, gərginliyin yaranmasında günahkar Ukrayna və NATO-dur”. Bütün bunların fonunda Rusiya ilə Türkiyə arasında etimad güclənməkdə davam edir. Bu, təkcə qazla bağlı əməkdaşlıq deyil, həm də taxıl müqaviləsidir”,- məlumatda deyilir.