“Ötən il Füzuli aeroportu açılan ərəfədə İran Azərbaycanla sərhədə hərbi texnika yığdı. Bizə hədə-qorxu gəlməyə başladı. İndi də Zəngilan hava limanının açılış ərəfəsidir. SEPAH Araz boyu hərbi təlimlərə başlayıb. Təsadüfdür, ya deyil, qəti fikir bildirmək istəmirəm.
Füzuli aeroportunun açılışında Rəcəb Tayyib Ərdoğan iştirak etdi. Zəngilan hava limanının açılışında da onun iştirakı gözlənir. Prezident Ərdoğan oktyabrın 20-də Azərbaycana gəlir. Türkiyə qardaş ölkədir. Həm də NATO dövlətidir”.
Elchi.az xəbər verir ki, bu barədə siyasi şərhçi Azər Ayxan FB hesabında qeyd edib:
“İsrail-Azərbaycan dostluq-tərəfdaşlıq münasibətləri fonunda Tel-Əvivlə Ankaranın barışması Tehranın ovqatını təlx edən amillər sırasında yer tuta bilər. İsrail müdafiə nazirinin 15 gün öncə Bakıya səfərini də yadda saxlayaq.
Amma bütün bu proseslər İranın əleyhinə deyil. Azərbaycan heç vaxt öz ərazisindən cənub qonşusuna qarşı istifadə edilməsinə imkan verməyib. Bu, Prezident İlham Əliyevin siyasətinin əsas prinsiplərindəndir.
Sadəcə qonşu xain olanda daim ətrafa xoflu davranır. İran Azərbaycanı özünə ən ciddi, ən böyük təhdid görür”.
Şayəstə
