Benyamin Netanyahunun rəhbərlik etdiyi Likud Partiyası İsraildə keçirilən növbədənkənar parlament seçkilərində ən çox səs toplayıb. Seçki nəticələri təkcə İsrail üçün deyil, regionun bir çox ölkələri üçün də önəmlidir. Yair Lapid və Naftali Bennet hökuməti Türkiyə ilə münasibətlərin normallaşması istiqamətində müəyyən nəticələr əldə etmişdi. Amma lider dəyişikliyinin bu uğurlara təhlükə yaratmaq ehtimalı var, ona görə də yeni kabinet öz xarici siyasətini diqqətlə yoxlamalı olacaq.
Elchi.az xəbər verir ki, bunu analitik Mariya Utkina deyib.
“12 ildir dövlətlər arasında münasibətlər gərgin olaraq qaldığından İsrailin Türkiyə ilə barışmaq qərarı son zamanlar ölkə üçün ən diqqət çəkən hadisələrdən birinə çevrilib. Bunun ardınca diplomatik əlaqələrin, hava nəqliyyatının bərpası və çoxsaylı yüksək səviyyəli görüşlər və səfərlər baş tutub. Netanyahu hakimiyyətdə olanda münasibətlər qorunurdu, lakin bəzən həm İsraildən, həm də Türkiyədən çox sərt bəyanatlar verilirdi. Hələlik hər iki ölkənin nümayəndələri ritorikanı yumşaldıb və bu, siyasi və diplomatik cəbhədə böyük dəyişikliklərə gətirib çıxarıb. Hər şey təkcə ritorikadan deyil, həm də Netanyahunun Fələstin və digər məsələlərlə bağlı addımlarından asılıdır”, – o bildirib.
Utkinanın sözlərinə görə, Türkiyə Prezidenti Rəcəb Tayyib Ərdoğan öz növbəsində artıq seçkidən sonra münasibətlərin gücləndirilməsinin tərəfdarı olduğunu bildirib:
“Türkiyənin xarici işlər naziri Mövlud Çavuşoğlu da İsrailin yeni hökuməti ilə normallaşma prosesini irəliyə daşımağa hazır olduğunu deyib. Netanyahunun hakimiyyətə qayıdışı tamamilə sürpriz olmadı və heç bir halda bölgədə normallaşma proseslərinin başa çatması demək deyil. Əlavə çətinliklər yarana bilər, amma bu yeni İsrail hökumətinə kimin daxil olacağından asılıdır”.
