İranın rəsmi agentliyi İRNA-nın xəbərinə görə, sözügedən anlaşma memorandumu İranın Kosmik Agentliyi və Rusiya Federal Kosmos Agentliyinin (Roskosmos) rəsmiləri arasında İranın Kiş adasında keçirilən Beynəlxalq Aviasiya Sərgisi zamanı imzalanıb.
Elchi.az xəbər verir ki, bu barədə imzalanma mərasimində çıxış edən İranın Kosmik Agentliyinin prezidenti Həsən Salariye bildirib ki, imzalanan anlaşma memorandumu iki ölkə arasında kosmos sahəsində əməkdaşlıq üzrə kommunikasiyanı gücləndirəcək.
“Bu əməkdaşlıq sənədi zondlama və telekommunikasiya peyklərinin yaradılması, laboratoriya infrastrukturunun yaradılması və montajı, həmçinin buraxılış bazası və peyk sınaqları sahəsində əməkdaşlıq kimi məsələləri əhatə edir”, – Salariye bildirib.
Roskosmosun prezidenti Yuri Borisov da bəyan edib ki, Moskva ilə Tehran arasında kosmik sənaye sahəsində əməkdaşlıq 2002-ci ildə başlayıb.
İranın bu sahədə əhəmiyyətli irəliləyiş əldə etdiyini bildirən Borisov, “İranın kosmik sənayenin inkişaf proqramı bu sənayenin bütün sahələrini əhatə edir və Rusiya İranın məqsədlərinə çatmasına kömək edir” dedi.
Borisov bəyan edib ki, iranlı astronavtların Rusiya kosmik stansiyasına göndərilməsi iki ölkənin birgə proqramlarından biridir.
Şayəstə
