İsraildə Benyamin Netanyahunun yaratdığı sağçı koalisiya parlamentdən etimad səsi alıb. Beləliklə, Netanyahu altıncı dəfə ölkənin baş naziri olub.
Elchi.az-ın “Ntv.com.tr”-yə istinadən xəbərinə görə, Netanyahunun rəhbərlik etdiyi yeni hökuməti təsdiqləməsindən sonra ABŞ prezidenti Co Bayden yazılı açıqlama verib.
“Mən onilliklər ərzində dostum olan Baş nazir Netanyahu ilə İsrail və Yaxın Şərq regionunun üzləşdiyi çoxsaylı problem və imkanları, o cümlədən İrandan gələn təhdidləri birgə həll etmək üçün işləməyi səbirsizliklə gözləyirəm”,-deyə Bayden qeyd edib.
ABŞ-ın daha inteqrasiyalı, firavan və təhlükəsiz Yaxın Şərq üçün çalışdığını vurğulayan Bayden, bu vizyonu dəstəkləmək üçün İsrail, Fələstin və digər regional tərəfdaşlarla birlikdə çalışdıqlarını və başçılıq etdiyi yeni İsrail hökuməti ilə bunu davam etdirməyi hədəflədiklərini bildirib.
Bayden həmçinin qeyd edib:
“Mən vəzifəyə gəldiyim gündən bəri etdiyimiz kimi, Birləşmiş Ştatlar iki dövlət həllini dəstəkləməyə və onun həyat qabiliyyətini təhlükə altına qoyan və ya bizim qarşılıqlı maraq və dəyərlərimizlə ziddiyyət təşkil edən siyasətlərə qarşı çıxmağa davam edəcək”.
Yeganə
