“Ölkəni Suriyaya çevirəcəklər…”
Türkiyədə HDP həmsədri, kürd əsilli Səlahəddin Demirtaş bildirib ki, AKP daha 4 il ölkəni idarə etsə, vəziyyəti yaxşı olmayacaq.
Musavat.com Türkiyə mətbuatına istinadən bildirir ki, Demirtaş partiyasının birinci Konqresində ciddi mesajlar verib. O, bildirib ki, Türkiyə bu gün ən çox sülhə, sabitliyə, qardaşlığa və azadlığa ehtiyac duyur. O, həmçinin qeyd edib ki, respublika tarixi boyunca Türkiyəni idarə edən siyasi partiyalar ölkənin problemlərini çözməyib.
AKP hökumətinin, son 12 ildə dövlətin bütün imkanlarını əlində cəmlədiyini bildirən Demirtaş, deyib ki, bununla belə, heç bir problem həll edilmir: “Dövlətin bütün imkanları AKP hökumətinin əlindədir, artıq partiya olmaqdan çıxıb dövlətə çevriliblər. Amma həll edilmiş bir problem yoxdur. On iki il əvvəl iqtidara gəldiklərində, həll etməyi söz verdikləri problemlərin hamısı olduğu kimi qalır”.
Ölkəsində kürdlərlə bağlı problemlərin həll edilmədiyini söyləyən Demirtaş qeyd edib ki, Türkiyənin sülh və dincliyə qovuşa bilməsi üçün HDP-nin iqtidarına ehtiyac var: “Türkiyə artıq bu şəkildə getməz, gedə bilməz. İnanın ki, AKP iqtidarı 4 il daha bu ölkəni idarə etsə, yönəltsə, ortada Türkiyə deyə bir şey qalmayaaq. Paramparça olacaq və ortaya böyük bir vətəndaş müharibəsi, böyük bir xaos təhlükəsi çıxacaq. Bizlər gerçək sülhü inşa bilməsək, əl-ələ verməsək, ölkəni Suriyaya çevirəcəklər”.
