Ermənistan hökuməti Türkiyə ilə sərhəddə su anbarının tikintisi üçün Almaniyanın KfW bankından 50 milyon avro kredit almaq ümidi ilə yaşayır.
ANS PRESS-in məlumatına görə, kredit razılaşmasının layihəsi Ermənistan hökumətinin iki gün əvvəl keçirilən iclasında bəyənilib. Vəsait Türkiyə ilə sərhəddə axan Axuryan çayında Kapsskoqosu su anbarının tamamlanmasına xərclənəcək. Bunun 2 milyon avrosu texniki dəstək üçün qrant kimi ayrılacaq. Suvarma üçün nəzərdə tutulan su anbarının həcmi 25 milyon kubmetr təşkil edəcək. Kreditin güzəştli şərtlərlə 15 illik müddətinə verilməsi planlaşdırılır.
Amma bəzi erməni mətbuatının yazdığı kimi, bu məsələ bir o qədər də real görünmür. Heç Almaniya tərəfi də bu barədə açıqlama verməyib. İndi dünya ölkələrində olduğu kimi, Almaniyada da iqtisadi vəziyyət ürəkaçan deyil və bu ölkənin bankları dəli deyil ki, pullarını havaya sovursunlar. Nə əcəb almanlar heç düşünməyiblər ki, bu pulu verdik, bəs, aclıq, yoxsulluq içində boğulan Ermənistan bu krediti hansı mənbə hesabına qaytaracaq?
Ümumiyyətlə, erməni rəsmiləri bu kredit layihəsindən ağızdolusu danışsalar da, amma sənədin nə vaxt imzalanacağının tarixi bəlli deyil. Bu, baş nazir Ovik Abramyanın növbəti fırıldağıdır desək, yanılmarıq. Çünki son vaxtlar Ermənistan hökumətinə inam çox azalıb və ölkə daxilində imici tamamilə yox səviyyəsindədir. Bunu açıq aydın hiss edən hökumət vətəndaşlara bir sıra şirin vədlər verməklə, reallığı şübhə doğuran layihələrin icrası ilə bağlı görüntü yaratmaqla vaxt udmağa çalışır.
Təbii ki, bu aldadıcı siyasətin fəlakətlə nəticələnəcəyi qaçılmazdır. Necə deyərlər, yalan baş tutar, amma yeriməz…
