Rusiyanın xarici işlər naziri Sergey Lavrov bildirib ki, Moskva Polşa və Baltikyanı ölkələrlə diplomatik münasibətləri pozmağa çalışmır. Bununla belə, bu ölkələrin Rusiya ilə əlaqəni tamamilə kəsmək qərarına gəlməyəcəyini də istisna etmək olmaz.
Elchi.az Vesti.ru-ya istinadən bildirir ki, Lavrovun sözlərinə görə, Polşa və Baltikyanı ölkələr uzun müddətdir ki, rusofobik kampaniyalar aparır və Qərbin hər hansı anti-Rusiya təşəbbüslərinin tərəfdaşı olmağa çalışırlar.
Rusiyalı nazir qeyd edib ki, son vaxtlar bu dövlətlərlə diplomatik münasibətlər xeyli pisləşib, qarşılıqlı fəaliyyət demək olar ki, sıfıra enib.
O, əlavə edib ki, Rusiya dialoqun kəsilməsinin tərəfdarı deyil, hətta çətin vəziyyətdə belə diplomatik münasibətləri saxlamaq lazımdır:
“Əgər bu ölkələr Rusiya Federasiyası ilə əlaqələri tamamilə kəsmək qərarına gəlsələr, o zaman məsuliyyət tamamilə bu dövlətlərin rəhbərliyinin üzərinə düşəcək. Rusiya öz maraqlarını qətiyyətlə müdafiə etmək niyyətindədir”.
Lavrov bildirib ki, Rusiya təhlükəsizlik mövzusunda Avropa ilə dialoqdan imtina etməyib. Moskva ümid edir ki, Avropa okeanın o tayında olanların istəklərinə deyil, öz maraqlarına arxalanacaq.
Yeganə
