“Peyğəmbərin surəti yoxdur” – İranlı rejissor

İran istehsalı olan “Məhəmməd Allahın Rəsuludur” filminin rejissoru Məcidi “Filmdə peyğəmbərin surəti yoxdur” – dedi. Həzrəti Məhəmmədin surətinin göstərilib-göstərilməyəcəyi ilə bağlı gündəmə gələn filmin təqdimat mərasimi, nəhayət ki, dünən baş tutdu. “Muhammədun Rəsulallah” kimi tanınan İran istehsalı filmin rejissoru Məcid Məcidi, İslam peyğəmbərinin mübarək doğumu və Vəhdət Həftəsi münasibəti ilə yaxın günlərdə Qala gecəsi keçiriləcək filmin təqdimat mərasimində media və mətbuat nümayəndələrinin suallarını cavablandırdı. “Cənnətin uşaqları”, “Cənnətin rəngi”, “Baran və sərçələrin mahnısı” kimi filmlərə imza atan dünyaca məşhur rejissor Məcidi Anadolu Agentliyinin müxbirinə verdiyi açıqlamasında film haqqında çox tez tənqidi fikirlər səsləndirildiyini və bu söhbətlərin yersiz olduğunu bildirib. Filmlə bağlı “Həzrəti Məhəmmədin üzünün göstərilib-göstərilməyəcəyi” mövzusunun ən çox danışılan məsələ olduğunu deyən Məcidi “Bu mövzuda İslam dünyasındakı həssaslıq üçün hər kəsə təşəkkür edirəm, amma filmdə peyğəmbərin surəti yoxdur” – dedi.  Məcidi İslam dünyasındakı bu həssaslığı da bir yerə qədər anlayışla qəbul edə biləcəyini dilə gətirdi. Əsilsiz dəyərləndirmələrin onu narahat etdiyini deyən rejissor sözlərinə belə davam etdi: “Çəkilişləri iki il davam edən  filmin hazırlıq ərəfəsində biz çox geniş araşdırmalar apardıq. Mövzunun mütəxəssisləri olan şiə və sünni alimlərlə müxtəlif ölkələrdə görüşüb söhbətlər təşkil etdik. Biz bu mövzu barədə həssaslığı başa düşürük”. İslam Peyğəmbərinin ucalığı və şəxsiyyətinə dair düşüncələrində lazımi qədər anlayışlı olduğunu bildirən rejissor “Məncə, İslam adına şiddət tətbiq edənlər və insan qatilləri ilə bağlı vəziyyətlərdə də reaksiyalar belə sağlam olmalıdır. İslam düşmənlərinə ən yaxşı cavabı kino ilə verə bilərik. Bütün İslam dünyasına səslənirəm. Gəlin bu sahəyə pul qoyub hamımız bərabər işləyək” – deyə mesaj yolladı. Filmin Şərq dünyasına və müsəlmanlara mesajını Məcidi belə izah etdi: “Filmin mövzu dairəsi olduqca önəmlidir. Şiə və sünni tarixçilər tərəfindən qəbul edilən hadisələr çərçivəsində Həzrəti Məhəmmədin uşaqlıq və gənclik dövrü sosioloji və dini dəyişmə baxımından çox həssas bir dövr hesab olunur. Məcidi Şərq dünyasının Həzrəti İsa və Həzrəti Musa haqqında bir çox film hazırladığını  xatırladaraq, “Buddistlər Budda haqda, təxminən, 45 film çəkiblər. Biz müsəlmanlar isə 40 il öncə Mustafa Akkadın çəkdiyi filmdən başqa Peyğəmbərimizin həyatı haqda film çəkmədik. Müsəlmanlar peyğəmbərlərinə daha artıq vəfa göstərsələr, yaxşı olardı. Bu mövzuda olan filmlər zəif çəkildiyi üçün beynəlxalq məkanda söz sahibi ola bilmədi. Mən bu cür işlərə əsas önəm verirəm.  Filmim haqqında lazımsız söhbətlər etməkdənsə, təklif edirəm ki, filmimi izləsinlər, sonra oturub bu barədə söhbət edək. Hətta istəyənlərlə yeni layihələrdə birgə işləməyə də hazıram” – dedi. Məcidi, filmin hazırlıq işlərindən montajına qədər müddətin tam 7 ilə başa gəldiyini vurğuladı.  Filmin Qalasının isə fevralda Beynəlxalq Fəcr Film Festivalında nümayişi gözlənilir.