Rusiya gecə saatlarında paytaxt Kiyev də daxil olmaqla Ukrayna şəhərlərinə intensiv hava zərbələri endirib.
Elchi.az xəbər verir ki, Kiyev Şəhər Hərbi Administrasiyasının rəhbəri Sergey Popko sosial media hesabından verdiyi açıqlamada rusların gecə saatlarında Ukraynaya güclü hücum təşkil etdiyini bildirib.
Hücumların ilkin təsbitlərə görə Tu-95 strateji təyyarələri ilə həyata keçirildiyini bildirən Popko, “Paytaxtda hava hücumu xəbərdarlığı təxminən 3 saat davam etdi. Ruslar qanadlı raketlər və İHA-larla eyni anda hücuma keçdi” ifadəsini işlətdi.
Popko Kiyev hava məkanında bütün Rusiya raketləri və PUA-larının müdafiə sistemləri tərəfindən məhv edildiyi, mülki şəxslər arasında itkilərin qeydə alınmadığı, mənzillərə və ya infrastrukturlara heç bir ziyan dəymədiyi barədə məlumat paylaşıb.
Ukrayna Baş Qərargah rəisi Valeriy Zalujnı da sosial media hesabından verdiyi açıqlamada rusların 02:30 radələrində 11 Tu-95 tipli strateji təyyarə ilə Ukraynaya hücum etdiyini bildirib.
Rusların Ukraynaya ümumilikdə 18 qanadlı raket atdığını ifadə edən Zalujnı, onlardan 15-nin Ukrayna qüvvələri tərəfindən məhv edildiyini bildirib.
Ukrayna Baş Qərargahının açıqlamasına görə, Rusiya ordusu gecə saatlarında Kramatorsk, Konstantinivka və Pavloqrad şəhərlərinə 5 raketlə hücum edib.
Digər tərəfdən, Pavloqrad şəhərinə edilən hücumlarla bağlı sosial mediada paylaşılan görüntülərdə mənzillərin şüşələrinin sındığı və şəhərin bir hissəsində böyük yanğının başladığı görülüb.
Dnepropetrovsk Vilayəti Hərbi Administrasiyasının rəhbəri Sergey Lisak sosial media hesabında Rusiyanın Pavloqrada təşkil etdiyi hücumlarda 3-ü uşaq olmaqla 25 nəfərin yaralandığını bildirib.
Şayəstə Hüseynova
