Məlumata görə, Almaniya hökuməti şirkətlərin Avropa Birliyinin Rusiyaya qarşı sanksiyalarını pozmağa qarşı mübarizədə daha məsuliyyətli olmasını istəyir.
Elchi.az xəbər verir ki, Almaniyanın Aİ-dəki səfiri dünən Aİ-nin Brüsseldə keçirilən 11-ci sanksiya paketi müzakirələri zamanı şirkətlərin Rusiyaya qarşı sanksiyaları pozanlara qarşı mübarizədə daha məsuliyyətli olması təklifi ilə çıxış edib.
Müvafiq olaraq, Aİ-yə daxil olmayan ölkələrin şirkətləri gələcəkdə Aİ-də müəyyən mallar alarkən, onları sonradan Rusiyaya ixrac etməməyi müqavilə əsasında öhdəsinə götürməli olacaqlar. İlk növbədə, bu öhdəlik təkcə mülki məqsədlər üçün deyil, həm də hərbi məqsədlər üçün istifadə oluna bilən malların, o cümlədən gecəgörmə cihazları və pilotsuz uçuş aparatlarının ixracına şamil ediləcək.
Almaniyanın təklifinin fonunda Aİ-nin Rusiyaya qarşı 11-ci sanksiyalar paketi ilə bağlı hazırkı danışıqlar dayanır.
Təklif ilk növbədə artıq qüvvədə olan sanksiyaların pozulması ilə mübarizəyə yönəlib.
Aylar ərzində Aİ Komissiyası Aİ ölkələrindən bir çox məhsulun Rusiyaya göndərilməsinə icazə verməkdən imtina etdi, həmçinin Rusiyaya qarşı sanksiyaların pozulması şübhəsi ilə müəyyən üçüncü ölkələrə ixracı məhdudlaşdırmaq üçün hüquqi imkan yaratmağı təklif edib.
Komissiyanın təklifi bütün Aİ ölkələri tərəfindən qeyd-şərtsiz müsbət qarşılanmır.
Bildirilir ki, bəzi Aİ-yə üzv dövlətlər mümkün cavab tədbirləri səbəbindən Çin kimi ölkələri belə siyahıya salmağa cəsarət və ya iradəyə malik olmaya bilər. Siyahıya salınacaq hər bir ölkə və hər bir məhsul üçün bütün 27 Aİ ölkəsinin təsdiqi tələb olunur.
Xəbərdə Rusiyaya qarşı sanksiyalardan yayınmaq üçün istifadə edilən ölkələr arasında Çindən başqa Qazaxıstan, Ermənistan və Birləşmiş Ərəb Əmirliklərinin də olduğu bildirilib.
Şayəstə Hüseynova
