Rusiya Ukrayna qüvvələrinin cəbhə xəttində irəliləyişini inkar edir.
Rusiya Müdafiə Nazirliyi rusiyapərəst mənbələrin Ukrayna əsgərlərinin Ukraynanın şərqində cəbhə xəttində irəliləmələri ilə bağlı xəbərlərini təkzib edib.
Rusiya tərəfində döyüşən “Vaqner” muzdlu dəstəsinin rəhbəri Yevgeni Priqojin nizami rus qoşunlarını Baxmut ətrafındakı mövqeləri tərk etməkdə ittiham edib.
Elchi.az BBC News-a istinadən xəbər verir ki, Rusiyalı hərbi bloggerlər cümə axşamı Ukraynanın bir neçə bölgədə irəliləyişləri və qoşunların hərəkəti barədə məlumat veriblər.
Kremlpərəst rus müharibə müxbiri Saşa Kots Kiyevin çoxdan gözlənilən əks-hücumunun başladığını iddia edib. O, “etibarlı” mənbələrə istinadən bildirib ki, Ukrayna tankları Rusiya ilə sərhədə doğru gedən Xarkov dairəvi yolunda olub. “Sütunlarda Qərb tank modelləri də daxil olmaqla aşağı yataqlı platformalar var” -Kotz deyib.
Kotz, Kiyevin Baxmut cinahlarında hücum hərəkətlərini başlaması ilə paralel olaraq şimal cəbhəsi boyunca vəziyyəti gərginləşdirməyə qərar verdiyini ifadə edib.
Digər rusiyalı müharibə müxbiri Aleksandr Simonov Telegram-da yazıb ki, Ukrayna qüvvələri Baxmut yaxınlığındakı Bohdanivka kəndi yaxınlığından keçərək “bir neçə kvadrat kilometr” ərazini ələ keçiriblər.
Ukraynalı hərbi analitik Oleksandr Musivenko bildirib ki, Kiyev gözlənilən əks-hücumun Rusiyanı “bütün işğal olunmuş ərazilərdə” məğlub edə bilməyəcəyini başa düşür.
O, Ukrayna NV radiosuna deyib ki, müharibənin gələn il davam etməsi üçün hər cür imkan var.”Hər şey döyüşlərin necə inkişaf etməsindən asılıdır. Biz əks-hücumun necə inkişaf edəcəyinə zəmanət verə bilmərik”.
Nuranə Məmmədova
