Moldova prezidenti Maya Sandu bildirib ki, hazırda Moldovanı heç nə təhdid etmir, çünki Rusiyanın başladığı müharibə Moldovanın sərhədlərindən çox uzaqdadır. Sandu vurğulayıb ki, Beynəlxalq Cinayət Məhkəməsinin qərarına əsasən, Moldova Putin respublikaya səfər edəcəyi təqdirdə onu həbs edəcək.
Elchi.az Deschide.md-yə istinadən xəbər verir ki, Sandu bu barədə “Euronews Rumıniya” kanalında qeyd edib.
“İndi Rusiya ordusunu sərhədlərimizdən uzaqlaşdıran Ukrayna sayəsində Moldova Respublikası üçün hərbi müdaxilə təhlükəsi yoxdur. Amma biz Rusiyanın ölkəmizdə sabitliyi pozmaq cəhdləri ilə üz-üzəyik. Biz bir neçə ay əvvəl həmin təcrübələr haqqında danışmışdıq. Nə yaxşı ki, qurumlarımız ölkəni qorumağı bacarıb və biz daha da sabitləşirik. Uzun illərdir ki, Rusiyanın enerjidən istifadə edərək ölkəmizi şantaj etməyə çalışdığını görmüşük”, – deyə Moldova prezidenti bildirib.
M.Sandu vurğulayıb ki, hazırda Moldova müstəqillik əldə etdikdən sonra ilk dəfədir ki, Dnestryanı istisna olmaqla, Rusiya qazını istehlak etmir:
“Belə bir şey ilk dəfədir ki, baş verir. Bu, o deməkdir ki, biz şaxələndiririk, üç onillikdə olduğu kimi, Rusiyadan asılı deyilik. Çalışırıq, daha möhkəm oluruq, amma təbii ki, dəstəyə ehtiyacımız var. Təbliğat böyük problemdir və bu, bizim demokratik prosesə təsir edib”.
Dövlət başçısının sözlərinə görə, kilsənin bir hissəsi, eləcə də bəzi siyasətçilər Moldova Respublikasında Rusiyanın maraqlarına xidmət edir. Dövlət qurumları onların səylərini əngəlləmək üçün lazımi tədbirlər görür:
“Biz dövlətimizin kifayət qədər güclənəcəyinə və belə insanların dövlətimizi, respublikamızın səylərini və maraqlarını pozmasına imkan verməyəcəyinə əmin olmaq üçün institutlarımızı gücləndiririk, kəşfiyyat xidmətlərimizdə islahatlar edirik, ölkənin təhlükəsizliyi üçün yeni strategiya hazırlayırıq. Bilirsiniz ki, hazırda bank fırıldaqlarına görə məhkum olunmuş və İsraildə gizlənən bir adamın rəhbərlik etdiyi cinayətkar, korrupsioner qrup var. O, Rusiyanın ölkəmizdə sabitliyi pozmaq cəhdlərinin əsas nümayəndəsidir. Müəssisələrimiz sənədləşdirir, sübutlar toplayır və Moldova Respublikasının əleyhinə işləyənləri, bizim səylərimizi pozmağa çalışanları və ölkəmizdə Rusiyanın maraqlarına xidmət edənləri aşkar etmək üçün bu prosesdə daha çox nəticə görəcəyimizə ümid edirik”.
Yeganə
