Çin və Mərkəzi Afrika ölkəsi Konqo Demokratik Respublikası ikitərəfli münasibətlərini “strateji qarşılıqlı faydalı əməkdaşlıq tərəfdaşlığından” “hərtərəfli strateji əməkdaşlıq tərəfdaşlığına” yüksəltdiklərini söyləyib.
Elchi.az xəbər verir ki, Çin Xarici İşlər Nazirliyindən verilən açıqlamaya görə, Konqo Demokratik Respublikası sədri Feliks Tşisekedi ölkəyə səfəri çərçivəsində Sədr Si Cinpin ilə görüşüb.
Görüş zamanı Si Cinpin Çin və Konqo Demokratik Respublikasının milli müstəqilliyə və müstəmləkəçiliklə mübarizəyə əsaslanan dərin ənənəvi dostluq əlaqələrinə malik olduğunu bildirib və iki ölkə arasında strateji tərəfdaşlığın ötən illər ərzində səmərəli nəticələr verdiyini deyib.
Çinin uzun illərdir Konqo Demokratik Respublikasının ən böyük ticarət tərəfdaşı olduğunu qeyd edən Si Cinpin sənaye, enerji, mədənçıxarma, kənd təsərrüfatı, infrastruktur və istehsal sahələrində əməkdaşlığı gücləndirmək və onu rəqəmsal iqtisadiyyat kimi potensial sahələrə genişləndirmək istədiyini bildirib.
Tşisekedi ölkəsinin Çin ilə iqtisadiyyat, ticarət, yeraltı sərvətlər, infrastruktur, səhiyyə və digər sahələrdə əməkdaşlığı dərinləşdirmək və bunu iki ölkənin xalqlarına fayda verəcək daha yetkin, sabit və innovativ əlaqələrə çevirmək arzusunda olduğunu bildirib.
Görüşdən sonra iki ölkə liderləri iki ölkə arasında investisiya, yaşıl və rəqəmsal iqtisadiyyat və digər sahələrdə əməkdaşlığa dair sənədlər imzalayıblar.
Nuranə Məmmədova
