Sabiq deputat Gültəkin Hacıbəyli 9 jurnalisti məhkəməyə verib.Virtualaz.org xəbər verir ki, onların arasında “Yurd TV”nin, “Palitra” və “Kaspi” qəzetlərinin, teleqraf.com, sia.az saytlarının əməkdaşları var.
G.Hacıbəyli jurnalistlərin xüsusi ittiham qaydasında cəzalandırılmasını tələb edir.
Jurnalistlərə qarşı iddia üzrə məhkəmənin hazırlıq iclası yanvarın 23-də Yasamal Rayon Məhkəməsində hakim Aqşin Əfəndiyevin sədrliyi ilə keçiriləcək.
Qeyd edək ki, həmin jurnalistlər G.Hacıbəylinin qəzəbinə qəribə bir səbəbdən gəliblər. Belə ki, onlar sabiq deputatın keçmiş həyat yoldaşı Mahmud Mehdiyevin ötən il keçirdiyi mətbuat konfransını işıqlandırdıqları üçün (?-red.) cəzalandırılmalı imişlər. Bu isə özlüyündə nonsensdir. Çünki mətbuat konfranslarında iştirak edərək orada səslənən fikirləri ictimaiyyətə çatdırmaq jurnalistin vəzifələrindən biri sayılır.
Onu da xatırladaq ki, G.Hacıbəyli Mahmud Mehdiyevi 2013-cü ilin mayında keçirdiyi mətbuat konfransında ona qarşı təhqiramiz ifadələr işlətməkdə günahlandırıb və M.Mehdiyevin Cinayət Məcəlləsinin 147 və 148-ci maddələri ilə cinayət məsuliyyətinə cəlb olunmasını istəyib. Yasamal Rayon Məhkəməsi isə iddianı təmin etməyib.
