Macarıstanın baş naziri Viktor Orban bildirib ki, Budapeştin məxfi xidmətləri Vaqner muzdlu təşkilatın yaradıcısı Yevgeni Priqojinin Rusiyada hərbi qiyam cəhdinə o qədər də əhəmiyyət vermir.
Elchi.az xəbər verir ki, “Bild” qəzetinə müsahibəsində o qeyd edib ki, bu hadisə çətin ki, xüsusi məna kəsb etsin və Ukraynadakı münaqişəyə heç bir təsir göstərməyəcək.
“Rusiya bizdən fərqli işləyir. Rusiyada strukturlar çox sabitdir. Onlar orduya, məxfi xidmətlərə, polisə əsaslanır, ona görə də fərqli ölkədir, müharibə yönümlü ölkədir. Ona görə də unutmayın ki, ruslar bizim, Almaniya və ya Macarıstan kimi ölkə deyil. Bu başqa bir dünyadır. Struktur fərqlidir, güc fərqlidir, sabitlik başqadır”, – Orban izah edib.
O, həmçinin əlavə edib ki, Rusiya hökumətinin guya zəif olması barədə danışmaq Ukraynadakı münaqişə fonunda aparılan təbliğatın yalnız bir hissəsidir. Orban vurğulayıb ki, Rusiya prezidenti Vladimir Putin güclü və populyar lider olaraq qalır.
“O, sabitdir, Rusiyanın seçilmiş lideridir, populyardır və onun arxasında duran strukturlar kifayət qədər güclüdür. Ona görə də biz bütün Rusiya kompleksinə ciddi yanaşmalıyıq”, – deyə Orban yekunlaşdırıb.
Nuranə Məmmədova
