Rusiya prezidenti Vladimir Putin Şanxay Əməkdaşlıq Təşkilatının Zirvə toplantısındakı çıxışında xarici güclər tərəfindən Rusiyaya qarşı hibrid müharibə aparıldığını bildirib və “Rusiya xarici təzyiqlərə, sanksiyalara və təxribatlara inamla müqavimət göstərir və müqavimət göstərəcək”,- deyib.
Elchi.az xəbər verir ki, Putin Hindistanın ev sahibliyi etdiyi Şanxay Əməkdaşlıq Təşkilatının (ŞƏT) Sammitində videokonfrans vasitəsilə çıxış edib.
ŞƏT-in konstruktiv əsaslar üzərində qurulduğunu deyən Putin təşkilatın beynəlxalq münasibətlərdə getdikcə daha mühüm rol oynadığını, sülhün və sabitliyin qorunmasına, üzv dövlətlərin davamlı iqtisadi artımının təmin edilməsinə və xalqlar arasında əlaqələrin möhkəmlənməsinə real töhfələr verdiyini bildirib.
Rusiya rəhbərliyinə göstərdikləri dəstəyə görə ŞƏT ölkələrinə təşəkkür edən Putin, “ŞƏT üzvləri ilə əlaqələrimizi daha da dərinləşdirməyi hədəfləyirik. Rusiyanın ŞƏT-ə üzv ölkələrlə ticarəti keçən il 37 faiz artaraq rekord həddə – 263 milyard dollara çatıb”,-deyə bildirib.
Nuranə Məmmədova
