Fransa polisi qazaxıstanlı keçmiş bankir Muxtar Ablyazova 30 gün ərzində ölkəni tərk etməyi əmr edib.
Elchi.az Mk.ru-ya istinadən xəbər verir ki, bu barədə keçmiş bankir şəxsi mikrobloqunda bildirib.
Ablyazovun sözlərinə görə, o, Fransanı tərk edib, onu qəbul etməyə hazır olan istənilən dövlətə getməlidir. Eyni zamanda, o, hazırda başqa ölkəyə getmək üçün pasportu və vizasının olmadığını açıqlayıb. Keçmiş bankir Fransa məhkəməsinin qərarına etiraz edəcəyini deyir.
Xatırladaq ki, Ablyazov 2009-cu ildə, onun rəhbərlik etdiyi BTA bankı müflis elan edilərək milliləşdirildikdən sonra Qazaxıstanı tərk edib. 2017-ci ildə o, rəhbərlik etdiyi bankdan təxminən 7 milyard dollar mənimsəməkdə ittiham olunaraq qiyabi olaraq 20 il həbs cəzasına məhkum edilmişdi, lakin artıq 2019-cu ildə sifarişli qətl təşkil etdiyinə görə ömürlük həbs cəzasına məhkum edilib.
O, Qazaxıstanla yanaşı, Rusiya və Ukrayna hakimiyyət orqanları tərəfindən də axtarışdadır.
Yeganə
