Cənubi Koreya Şimali Koreyanın 1950-1953-cü illərdə Koreya Müharibəsində münaqişəyə son qoyan Panmunjom barışıq müqaviləsinin 70-ci ildönümünü qeyd etmək üçün keçirdiyi hərbi paraddan “dərin kədərləndiyini” bildirib.
Elchi.az Yonhap-a istinadən xəbər verir ki, Cənubi Koreyanın Birləşmə Nazirliyinin sözçüsü Koo Byonq-sam Şimali Koreyanı sülh üçün “düzgün yolu seçməyə” çağırıb.
Şimali Koreyanın atəşkəsin 70-ci ildönümünü qeyd etdiyinə görə “dərin kədər” duyduqlarını ifadə edən Koo, Pxenyanın nüvəsizləşdirilməsi və sülh axtarmağa çalışmalı olduğuna diqqət çəkib.
Şimali Koreya iyulun 27-də atəşkəs razılaşmasının 70-ci ildönümündə hərbi parad keçirdi və burada qitələrarası ballistik raketlərini və pilotsuz uçuş aparatlarını nümayiş etdirdi.
Mərasimdə Pxenyana səfər edən Rusiyanın müdafiə naziri Sergey Şoyqu və Ümumçin Xalq Nümayəndələri Yığıncağı Daimi Komitəsinin sədr müavini Li Honkonq iştirak edib.
Şayəstə Hüseynova
