Nazir 50-yə yaxın vətəndaşın müraciətinə baxıb
Ekologiya və Təbii Sərvətlər Naziri (ETSN) Hüseyn Bağırov Sabirabad şəhərində vətəndaşlarla görüşüb.
ANS PRESS-in ETSN-in mətbuat xidmətinə istinadən verdiyi məlumata görə, qəbul yanvarın 30-da Heydər Əliyev Mərkəzində olub. Görüşdə nazir Sabirabad, Saatlı, Hacıqabul rayonları və Şirvan şəhərinin vətəndaşları ilə görüşüb.
Nazirliyin idarə və departamentlərinin, həmçinin tabeli qurumlarının rəhbərlərinin iştirak etdiyi qəbulda ətraf mühitin və ekoloji tarazlığın mühafizəsi, meşələrin qorunması, biomüxtəliflik, geologiya, hidrometeorologiya, ətraf mühitin monitorinqi və s. məsələlərlə bağlı 50-yə yaxın vətəndaşın müraciətinə baxılıb.
Qəbul zamanı Nazir vətəndaşların müraciətlərini, şikayət və təkliflərini dinləyərək hərtərəfli öyrənilməsi və qanunvericiliyə uyğun müvafiq tədbirlərin görülməsi üçün Nazirliyin müvafiq strukturlarının rəhbərlərinə konkret tapşırıqlar verib. Eyni zamanda, vətəndaşlar tərəfindən verilən müxtəlif təkliflər qeydə alınıb, onları narahat edən şikayət xarakterli müraciətlər araşdırılaraq müvafiq tədbirlərin görülməsi üçün nəzarətə götürülüb.
Ekologiya və Təbii Sərvətlər Nazirliyinin fəaliyyət dairəsinə aid olmayan müraciətlər isə müvafiq qurumlara çatdırılmaq üçün qeydiyyata alınıb.
ANS PRESS
