Salatın Əsgərova küçəsində yaşıllıq kütləvi şəkildə məhv edilir; Həmin ərazinin dövlət məmuru tərəfindən özəlləşdirildiyi iddia edilir
Bakının Nəsimi rayonu ərazisindəki Salatın Əsgərova küçəsində ağaclar kütləvi şəkildə kəsilir. “Ağac qətliamı” prosesi fevralın 3-dən etibarən başlayıb.
Hadisə yerində olduğumuz zaman artıq yaşıllıqların məhv edilməsi prosesi başa çatmaq üzrə idi. Ağacları kütləvi şəkildə məhv edən şəxslərin də mövqeyini öyrənməyə çalışdıq.
Amma bu, mümkün olmadı. Onlar çəkilişimizə əngəl olmağa, kadrlara düşməməyə çalışırdılar. Adının açıqlanmasını istəməyən və “Ağac qətliamı”na rəhbərlik edən şəxs onlara verilən tapşırığı icra etdiklərini bildirdi: “Təbii ki, heç kəs özbaşına şəhərin mərkəzində belə işlər həyata keçirə bilməz. Biz sadəcə, tapşırığı icra edirik. Özünüz araşdırsanız, bu, məlum olacaq. Hansısa bir qurumun, şəxsin adını hallandırmaq istəmirəm. Ağacların kəsilməsinin səbəbi ilə bağlı da bizə heç nə deyilməyib”.
Sakinlərin iddialarına görə, ağacların kəsilməsi qarşıdan gələn Birinci Avropa Yay Olimpiya Oyunları və ərazidəki yaşayış evlərinin sökülməsi ilə əlaqədardır. Sakinlər iki il öncədən ərazidəki həyət evlərinin söküləcəyi ilə bağlı onlara xəbərdarlıq edildiyini bildirdilər.
Həmin ərazidə yaşayanlardan Natiq adlı ağsaqqal kəsilən ağacların hansı səbəbdən məhv edildiyinin onlara məlum olmadığını söylədi: “50 ildən çoxdur ki, bu ərazidə yaşayıram. Gözlərimi açandan bu ağacları görmüşəm. Gözlərimin qarşısında böyüyüblər. Təəssüf ki, indi ağacların məhv edildiyinin şahidi oldum. Bu, vandalizmdir. Ağaclar ətrafa gözəllik verirdi. Ağacların kəsilməsinin səbəbini soruşduq. Konkret cavab verən olmadı. Bu qədər özbaşınalıq olmaz. Eşitmişik ki, guya bu, yayda keçiriləcək yarışlarla bağlıdır. Açıqca görünür ki, bu ərazinin heç nəyə maneçiliyi yoxdur. Bunlar bizi ərazidən köçürməyə hazırlıq işləri görürlər. Bununla bağlı sakinlər olaraq, aidiyyatı orqanlara müraciət edəcəyik”.
Adının çəkilməsini istəməyən sakinlərdən biri daha şok iddialar səsləndirdi: “Hələ bir müddət bundan öncədən eşitmişəm ki, bu ərazi dövlət məmurlarından biri tərəfindən özəlləşdirilib. Ona görə də, hissə-hissə ərazidə “təmizləmə işi” aparırlar. Elə edəcəklər ki, sonda yalnız sakinlər burada qalacaq. Onları çıxarmaq isə asan olacaq. Araşdırılma aparılsa, hər şey çılpaqlığı ilə üzə çıxacaq. Əslinə qalsa, sakinlərin çox hissəsi bundan xəbərdardır. Sadəcə, qorxularından demirlər”.
Digər sakinlərin fikirlərini də öyrənməyə çalışdıq. Lakin israrla müsahibədən yayındılar.
Onu da qeyd edək ki, kəsilən ağaclar qısa müddət ərzində ərazidən götürülürdü. Yeri isə tamam təmizlənirdi. Bütün bunlar sakinlərin iddialarının həqiqətə yaxın olduğunu göstərirdi.
Axşam saatları olduğunu görə aidiyyatı orqanların bu məsələ ilə bağlı mövqeyini öyrənə bilmədik.
Mövzuya yenidən qayıdacağıq.
Cavanşir ABBASLI,
Fotolar müəliffindir.
