Rəfail Becanov 
Son həftəni Allah heç düşmənə də göstərməsin. Çox rəngli həftəydi. Lamiyə, Maral, Elzadan ibarət “Bermud üçbucağına” Qubad İbadoğlunun Müsavatdan çıxarılması və ona görə partiyadan istefa edənlər də qarışdı. Həftə boyu Lamiyənin “qanunsuz” yolla ana olmasının giriftarı olduq. Nə var ki, Lamiyə türmədə ola-ola hansı yollasa ana olub.
Onun bu “qanunsuz” analığı cəmiyyətin bütün diqqətini özünə çəkdi. Nəinki diqqətini çəkdi, həm də huşunu apardı. İman bir yerə güman min yerə getdi. Amma hələ də nəticə əldə edilməyib. Hədəfə vuran isə “Qafqazinfo.az”ın başqanı Elbrus Ərud oldu. Dedi ki, Lamiyə naməlum şəraitdə ana olduğundan müvəqqəti olaraq, əsl ata üzə çıxana, tapılana qədər o funksiyanı türmədəki dustaqlara və ordakı qaydalara birbaşa cavabdehlik daşıyan, general Mədət Quliyev icra etməlidir.
Günün, həftənin ən aktual mövzusunu sıradan çıxarmağa gücü çatmasa da, yalnız Maral hadisəsi onunla tən gəldi. Maral Tahirqızı deyilən “dünyada ən zil səsli” müğənni insan alveriylə məşğul olurmuş və ona cinayət işi açılıb. Mətbuatın, ictimiayyətin informasiyalı kəsimi bunun fikrini çəkdiyi vaxt Elza Seyidcahanı kimsə ilin şairəsi elan etdi. Yaxşı Elza ilin şairi olacaqdısa, mərhum Vaqif Səmədoğlu da yaşayıb bunu eşitməli, milli mətbuatımızdan oxumalı, rəngli televiziyalarımızdan eşitməyə borcluydumu? Hər şeydə bir xeyir var deyirlər. Bəlkə də rəhmətlik Vaqif Səmədoğlunu Allah öz dərgahına bunu eşitməməkçün belə tez apardı. İndi Elzanın ilin şairəsi seçilməsinin əzabını qoy Ramiz Rövşən, Vaqif Bayatlı Odər, Rüstəm Behrudi, Məmməd İsmayıl, Salam Sarvan yaşasın. Onların qismətində bu varmış…
Qismətdən qaçmaq olmaz. Elə Qubad İbadoğlunun Müsavatdan çıxarılması da onun qismətiymiş ki, yaşadı.
Zənnimcə, büün bunlar Azərbaycan cəmiyyəti üçün Zaurun “Öz aramızda”, Elgizin “El içində”si qədər aktualdır. Ölkədə mən bildiyim qədər 55 siyasi partiya qeydiyyatdan keçib və onlardan biri də Müsavat partiyasıdır. Bu partiyaların hər birinə gündə, ayda, yaxud ildə deyə bilmərəm, amma müxtəlif adamlar üzv olur, bəzən kimsə istefa verir, bəzən də partiyadan onları çıxarırlar. Bunun nə fərqi var ki?! Müsavatdan Qubad İbadoğlunun çıxarılması və ya qalması nəyi dəyişirdi? Guya Qubad İbadoğlu lap başqan olsaydı nəsə dəyişəcəkdi? Arfi Hacılının de-fakto başqan olması ilə nə baş verib axı? İnsanlar sanki bunun fərqində deyillər, elə özlərini bu kimi informasiyalarla yorurlar, sosial şəbəkələri bu informasiyalarla yükləyirlər. Qubad İbadoğlunun yaxşı iqtisadçı olmasına, Qırğızıstan hökumətində iqtisadi müşavir kimi fəaliyyətlərinə etiraz yox. Amma partiya ilə düşüncələri üst-üstə düşmürsə, oradan çıxarılması da günün mövzusu deyil, həm də labüd idi. Rusiya iqtisadiyyatının “xaç atası” sayılan keçmiş maliyyə naziri Kudrini yəqin ki, çox adam xatırlayır. Hökumətlə fikirləri üst-üstə düşmədi, Medvedyev onu istefaya göndərdi. Adi qaydadır. İndi Qubad İbadoğlunun partiyadan çıxarılması da, onunla birlikdə Müsavatdan gedənlərin olması da adi haldır. Siyasətin əlifbeyidir. Cəmiyyət üçün faydalılıq əmsalı sıfırdır. O sırada olanlardan biri, Hüseyn Məlik böyük mübariz yolu keçən, əqidəli və təmiz, təşkilatçı bir şəxsdir. Bir zaman KXCP-dən Müsavata getdi. Onun gedişi ilə KXCP nəyi dəyişdi, yaxud KXCP-də nə dəyişdi ki. indi də Müsavatda baş versin? Cəmiyyətin, mətbuatın vaxtını bu kimə işlərə sərf etməsi heyifdir. Dünyanı bürüyən ciddi informasiyalar qalıb bir tərəfdə, iqtisadi krizis, infliyasiya, neftin qiymətinin enməsi, bunun ölkələrə və bizə təsiri və s. Bu kimi hadisələrin təhlili, analizi, ölkəmizə, regionumuza təsiri ilə cəmiyyəti məlumatlandırmaq olardı. Dünyanı və onun tərkib hissəsi olaraq, ölkəni bürüyən rus təbliğatı da qalıb birtərfdə.
Son bir həftədə qəbul edilən bir sıra mühüm qərarlar, sərəncamlar var ki, əhali onları bilmək istəyir. Bəzən rastlaşdıqlarımız soruşurlar ki, mən evimi satsam vergi ödəməliyəmmi? Tək-tək adamlara cavab vermək mümkün deyil. Əlimizdə də başqa vasitə yox. Mütəxəssilər cəmiyyətin yaşamına təsir edən bu kimi məsələləri mətbuatla, sosial şəbəkələrlə insanlara çatdırsaydı nə gözəl olardı…Nəinki Lamiyə, Maral, ya Elza, eləcə də Müsavatdan gedənlər və ya göndərilənlər…
