Nigerin üsyançılar tərəfindən təyin edilmiş keçid hökumətinin başçısı Əli Lamin Zeyn Fransanı Afrika ölkəsinin yeni hakimiyyətinin tanınmış nümayəndələrini öldürmək planı hazırlamaqda ittiham edib.
Elchi.az bu barədə “Əl-Cəzirə” telekanalına istinadən xəbər verir.
“Fransa digər düşmənlərimizlə birlikdə ölkənin tanınmış nazirlərini və rəhbər nümayəndələrini öldürmək planı hazırlayıb. Fransa Nigerdə vəziyyəti sabitləşdirmək üçün öz alətlərindən istifadə edir”, – telekanal baş nazirin sözlərini sitat gətirib.
Xatırladaq ki, iyulun 26-da Nigerdə prezident qvardiyasının bir qrup hərbçisi qiyam qaldıraraq prezident Məhəmməd Bazumun vəzifəsindən uzaqlaşdırıldığını bəyan edib. Ölkəni idarə etmək üçün qvardiya komandiri Abdurahman Tçianinin rəhbərlik etdiyi Vətənin Qurtuluşu Milli Şurası (VQXŞ) yaradılıb. Yeni hakimiyyət Fransa ordusunun yerləşdirilməsi ilə bağlı bu ölkəylə hərbi razılaşmaları pisləyib və kontingentin çıxarılmasını tələb edib.
Havar Şəfiyeva
