PA rəsmisi Əli Həsənov iqtidar-müxalifət dialoqundan danışdı
“Siyasi partiyalarla görüşün artıq ənənə halını almaqdadır”. ANS PRESS-in məlumatına görə, bunu bu gün Beynəlxalq Mətbuat Mərkəzində iqtidar-müxalifət dialoqunda iştirak edən Prezidenti Administrasiyasının ictimai-siyasi məsələlər şöbəsinin müdiri Əli Həsənov deyib.
Şöbə müdiri iki ay bundan əvvəl ilk belə görüşün keçirildiyini xatırladıb və bildirib ki, həmin görüşdə hakimiyyət nümayəndələri ilə siyasi partiyalar arasında keçirilən görüşlərin formatı, tematikası müzakirə olundu.
“Həmçinin cəmiyyətə çatdırılacaq fikirlər, ideyalar, siyasi partiyalarla hakimiyyətin əməkdaşlığının bəzi prinsipial məsələləri, siyasi partiyaların Azərbaycan cəmiyyətində yeri və rolu, ictimai-siyasi institut olaraq partiyalarda təmsilçilik, onların maliyyələşməsi, partiya və mətbuat, partiya və Azərbaycanın daxili və xarici siyasəti və s. mövzularda çıxışlar oldu. Bu çıxışlarda kifayət qədər rasional ideyalar var idi və həmin ideyalar Prezident Administrasiyası tərəfindən qeydiyyata alındı. Gələcək toplantılarda müvafiq olaraq bu məsələlərə qayıdılacaq”.
Ə.Həsənov qeyd edib ki, hal-hazırda hakimiyyətlə ona müxalif mövqedə olan siyasi qüvvələr arasında ölkənin, dövlətin, cəmiyyətin bu günü və gələcəyi ilə bağlı istənilən məsələlər müzakirə mövzusu ola bilər. “Hazırda hakimiyyətdə olan siyasi qüvvə ilə ona müxalif olan qüvvə arasında ölkənin, dövlətin və cəmiyyətin bu günü və gələcəyi ilə bağlı istənilən məsələlər müzakirə mövzusu ola bilər”.
ANS PRESS
