Siyavuş Novruzov: “Hətta bizə düşmən olan ermənilərə də münasibət heç vaxt pis olmayıb; onlar özləri bu hadisələri başlatdılar”
“Bu, Avropaya aid məsələdir. Yəhudilərin Azərbaycanda heç bir problemi yoxdur. Azərbaycanda yəhudiləri körpə uşağı bəsləyən kimi bəsləyirlər. Bizim cəmiyyətdən, hökumətdən, prezidentdən heç bir umacağımız, Azərbaycan xalqından umu-küsü etmək üçün heç bir problemimiz yoxdur”.
Yuxarıdakı fikirlər Azərbaycan Milli Məclisinin yəhudi əsilli deputatı, Azərbaycan-İsrail parlamentlərarası əlaqələr üzrə işçi qrupunun rəhbəri Yevda Abramova məxsusdur. “Yeni Müsavat”a müsahibəsində yəhudi deputat İsrailin baş naziri Benyamin Netanyahunun bazar günü Danimarkanın paytaxtı Kopenhagenin ən böyük sinaqoqunda baş verən qanlı hadisədən sonra Avropada yaşayan yəhudiləri İsrailə köçməyə səsləməsinə münasibət bildirərkən belə deyib.
Y.Abramovun sözləri bir daha onu isbatlayır ki, Azərbaycanda sayı 20 minə çatan yəhudilərə tam fərqli münasibət var. Maraqlıdır, bu münasibətin sirri nədir?
YAP icra katibinin müavini, deputat Siyavuş Novruzov isə burada sirr olmadığını deyir: “Hələ lap qədim dövrlərdən Azərbaycanda və Türkiyədə yəhudilərə münasibət çox normal olub. Hətta yəhudilər ayrı-ayrı məmləkətlərdə, Rusiyada, keçmiş SSRİ-də, Polşada, Almaniyada, Ərəbistan yarımadasında sıxışdırılan vaxt Azərbaycanda onlara normal münasibət bəslənilib. 90-cı illərdə ara qarışanda onların bəziləri Azərbaycanı tərk etdi, ancaq sonrakı illərdə hamısı yenə də geri qayıtdı. Ölkədən gedən yəhudlərin də bu gün harda yaşamalarından asılı olmayaraq Azərbaycandakı qohumları, qonşuları, tanışları ilə sıx əlaqələri var, gəlib-gedirlər”.
S.Novruzov deyir ki, Azərbaycanda ümumiyyətlə hər hansı bir millətin nümayəndəsinə ayrıseçkilik edilmir: “Hətta bizə düşmən olan ermənilərə də münasibət heç vaxt pis olmayıb. Onlar özləri bu hadisələri başlatdılar. Bu gün Bakıda 30 mindən artıq erməni yaşayır, onların birinə qarşı hansısa ağır ifadə işlədən belə yoxdur. Ancaq Ermənistanda bir nəfər də olsun yəhudi, türk yaşamır, orda monomiləlt yaradılıb”.
YAP-çı deputat istisna etmir ki, yəhudilərin və azərbaycanlıların tarxidə soyqırıma məruz qalmaları da onları yaxınlaşdıran amillərdəndir: “Amma ümumilikdə hələ Azərbaycanda soyqırımlar olmamışdan qabaq da yəhudilərlə azərbaycanlılar mehriban yaşayırdı. Azərbaycanda hələ bir əsr əvvəl almanlar yaşayırdı, indiki Göygöl rayonunun ərazisində məskunlaşmışdılar. Demokratik Respublikanın hökumətində almanların nümayəndəsi təmsil olunurdu, parlamentində yəhudilər təmsil olunurdu, 21 erməni, 2 alman millət vəkili, həmçinin ruslar var idi. Azərbaycanda tolerantlıqdan danışanda bilmək lazımdır ki, bunun kökü, əsası var. Amma başqaları bu kökü, əsası göstərə bilmir”.
