Papua Yeni Qvineya hakimiyyəti Ulavun vulkanının püskürməsi ilə əlaqədar Yeni Britaniya adasının qərbində 13 mindən çox insanı təxliyə edib.
Elchi.az BBC.com-a istinadən xəbər verir ki, bu barədə “Radio New Zealand” radiostansiyası məlumat yayıb.
Radiostansiyanın məlumatına görə, noyabrın 20-də aktivləşən Ulavun püskürməsi ilə əlaqədar Yeni Britaniya adasının qərb bölgələrindəki kəndlərin 13 mindən çox sakini Biala şəhəri yaxınlığındakı dörd tibb mərkəzinə təxliyə edilib.
Həmçinin bildirilib ki, vulkanın püskürməsi ilə əlaqədar Yeni Britaniyanın qərb bölgələrində çoxlu kül yığılıb, magistral yollar bağlanıb, hava əlaqəsi dayandırılıb. Papua-Yeni Qvineya polisinin hələlik qurbanlar barədə məlumatı yoxdur, lakin departament təxliyə edilənlərin humanitar yardıma ciddi ehtiyacı olduğunu bildirir.
Püskürmənin nəticələrini aradan qaldırmaq üçün ölkə hökuməti fövqəladə hallar xidmətlərinin əlaqələndirilməsi və humanitar yüklərin paylanması ilə məşğul olacaq operativ baza yaradıb.
Yeganə
