Avropa İttifaqı (Aİ) diplomatiyasının rəhbəri Cozep Borell hesab edir ki, qalib siyasətçinin şəxsiyyəti dünyada getdikcə daha çox əhəmiyyət kəsb edir və ABŞ-da keçiriləcək seçkilərdə qalib gələcək şəxs avropalılar üçün çox vacibdir.
Elchi.az bu barədə BBC.com-a istinadən xəbər verir.
“Kimin məsul olduğu getdikcə daha vacib olur. ABŞ-ın növbəti prezidentinin kim olacağı biz avropalılar üçün çox vacib sualdır”, – deyə o, “Sommet Grand Continent” konfransında çıxışı zamanı deyib.
Borell öz sözlərini ABŞ-da keçiriləcək seçkilərin Rusiyaya daha əlverişli ssenari verə biləcəyi ilə də izah edib.
2024-cü ildə Aİ ölkələrində və Avropa qurumlarında keçiriləcək seçkilərdən danışan Borell, onların Ukrayna və Yaxın Şərqdəki münaqişələrdən əhəmiyyətli dərəcədə təsirlənəcəyinə əminliyini ifadə edib.
“Bu münaqişələrin bizim üçün birbaşa nəticələri var və təhlükəsizlik vəziyyətinə təsir göstərir. Ona görə də təbii ki, onların seçkilərə təsiri olacaq. Mən seçicilərimizin qorxusundan qorxuram, qorxuram ki, onlar qorxu hissi ilə səs versinlər, çünki naməlum qorxu və qeyri-sabitlik qorxusu onları təhlükəsizlik təklif edənləri seçməyə məcbur edir”, – deyə Borel qeyd edib.
Yeganə
