2023-cü ildə NATO Ukraynanı dəstəkləmək və Rusiyaya qarşı müdafiə və çəkindirmə gücünü gücləndirmək gündəminə diqqət yetirərkən, Finlandiyanı 31-ci üzv kimi qəbul edərək 9-cu dəfə genişlənib.
Elchi.az xəbər verir ki, NATO Rusiya ilə münasibətlərdə ən gərgin ili geridə qoyduğu 2022-ci ildən sonra 2023-cü ilə Ukrayna gündəmi ilə daxil oldu.
Bir ildən artıqdır davam edən müharibə səbəbindən 2014-cü il oktyabrın 1-dən vəzifədə olan NATO-nun baş katibi Yens Stoltenberqin səlahiyyət müddəti 2022-ci ildə başa çatıb, daha əvvəl 3 dəfə uzadılmasına baxmayaraq, bir daha 2024-cü ilin oktyabr ayına qədər uzadılıb.
Yanvarın 5-də ilin ilk bəyanatında Stoltenberq bildirib ki, “müharibənin nəticəsinin nə olacağı və nə vaxt bitəcəyindən asılı olmayaraq, Avropada təhlükəsizlik vəziyyəti həmişəlik dəyişib”.
Baş katib vurğulayıb ki, NATO müttəfiqləri müdafiəyə daha çox sərmayə qoymalıdırlar.
İl ərzində NATO-nun iclaslarında Alyansın müdafiə və çəkindirmə gücünün gücləndirilməsi və NATO qüvvələrinin hazırlığının artırılması kimi məsələlər diqqət mərkəzində olmuşdur.
NATO-nun Rusiya ilə birbaşa münaqişəyə girməmək siyasəti ehtiyatla davam etdirilsə də, il ərzində müttəfiqlər Ukraynaya hərbi və maliyyə dəstəyinin artırılması üzərində işləyirdilər.
Bu günə qədər NATO və müttəfiqləri Ukraynaya hava hücumundan müdafiə sistemləri, müxtəlif ağır silahlar, sursat, yanacaq və rabitə vasitələri kimi çoxlu dəstək verib.
Şayəstə Hüseynova
