ABŞ seçkiləri yaxınlaşdıqca, anketlərdə öndə görünən Donald Trampın təhlükəsizlik strategiyası ortaya çıxıb.
Elchi.az xəbər verir ki, yaxın müşavirlərindən alınan məlumata görə, Tramp yenidən prezident seçiləcəyi təqdirdə NATO-nu maliyyə cəhətdən gərginləşdirəcək və Ukraynanı Rusiya ilə sülh bağlamağa məcbur edəcək qərarlar qəbul etməyə hazırlaşır.
ABŞ-da aparılan sorğulara görə, prezident seçkilərinə 9 ay qaldıqda Donald Tramp həm Respublikaçılar Partiyasındakı rəqiblərini, həm də Demokratlar Partiyasının namizədi, ABŞ prezidenti Co Baydeni qabaqlayır. Sorğulara görə, ABŞ-ın keçmiş prezidenti Tramp rəqibləri ilə arasındakı fərqi günü-gündən artırır. Trampın qələbəsi müəyyən hesab edilsə də, ABŞ-da yerləşən qlobal hərbi və kəşfiyyat nəşri “military.com” bütün dünyada rezonans doğuracaq məlumatları dərc edib. Nəşrin Trampa yaxın adamlardan və onun müşavirlərindən əldə etdiyi məlumata görə, keçmiş prezident yenidən seçiləcəyi təqdirdə NATO-nun xarici görünüşünü və fəaliyyətini “tamamilə dəyişməyi” və Rusiya-Ukrayna müharibəsində sülh razılaşmasının əldə edilməsində vasitəçilik etməyi planlaşdırır. NATO-da böyük narahatlıq var.
Şayəstə Hüseynova
