Avro-4 standartı tətbiq olunduqdan sonra Azərbaycana gətirlən işlənmiş maşınların sayında 50 faizə qədər azalma müşahidə olunur
Bu barədə AİM.az-a “Avtosfer”.az saytının baş redaktoru Elmədin Muradlı bildirib. Onun sözlərinə görə, durğunluğa manatla dollar arasında böyük fərqin yaranması səbəb olub:
“Baxın, bazarlarda inci əl avtomobillər dollarla satılırdı. İndi nə dollara, nə də manata sata bilirlər. Gürcüstanın statistika idarəsi açıqlama verdi ki, Avro-4 standartı tətbiq olunduqdan sonra Azərbaycana gətirlən işlənmiş maşınların sayında 50 faizə qədər azalma müşahidə olundu. Bu çox böyük təsirdir. Artıq ölkədə 1995- 96 və 2000-ci ilin maşınlarını görə bilmirik. Onları gətirə bilmirlər. Çünki o ildən olan avtomaşınlar avro-4 standartına uyğun gəlmir. 2001-ci ildən bu yana olan maşınlar gətirilir ki, bu da bazarda bahalaşma yaradır. Təsəvvür edin ki, 5 ay bundan əvvəl 8-10 v 12 min dollara 2000-ci ilin “Mercedes”ini ala bilən adam bu gün artıq onu əldə edə bilmir. Çünki bu 15 min manata gəlib çıxır. Çox adam da oturub gözləyir ki, bəlkə nə isə dəyişdi. Hamı gözləyir. Bu səbəbdən insanlar maşın almağa meyl göstərmir”.
Əksər avtosalonlar fəaliyyətini dayandırıb
Müsahibimizin fikrincə, məxsusi olaraq Badamdar qəsəbəsindəki maşın bazarında vəziyyət çox gərgindir:
“Orada artıq əksər avtosalonlar fəaliyyətini dayandırıb. Satış olmadığına görə, heç yer pulu ödəyə bilmirlər. Arada dəllallıq edənlər dağılışıb, gediblər. Dollar qalxmamışdan qabaq maşın bazarına gedən yola girmək olmurdu. Tıxaca düşürdük. Bakı şəhər Yol Polis İdrəsinin yanından başlayan tıxac maşın bazaranın yanında qurtarırdı. İndi şənbə bazar günü də getsən, sıxlıq olmur. Çünki gəlib-gedən yoxdur”.
Əvvəllər, “Avtosfer”. az-a çoxsaylı suallar ünvanlayırdılar, indi heç ayda bir dəfə də sual verilmir
E.Muradlı onu da diqqətə çatdırıb ki, hazırda nə maşın almağa, nə də dəyişməyə meyl var:
“Hər kəs əlində olan maşınla kifayətlənir. Ucuz alıblar. Düşünürlər ki, indi satıb, bəlkə bir az irəli düşələr. Amma yenisini alanda yenə itirəcəklər deyə kimin əlində nə var, onunla kifayətlənir. Almaq istəyənlər də hələ fikirləşirlər. Əvvəllər, “Avtosfer”. az saytına çoxsaylı suallar ünvanlayırdılar ki, maşın almaq istəyirik, hansı modeli məsləhət görürüsünüz. İndi o sualı heç ayda bir dəfə də vermirlər”.
Mənsur Türksoy,
Aim.az
