Ermənistanın paytaxtı İrəvanda siyasi həbslərə qarşı “Milyonların maskalı marşı” keçirilib.
Teleqraf.com xarici mediaya istinadən xəbər verir ki, yürüşdə “Siyasi məhbuslara azadlıq” şüarı səsləndirilib. Polisdən verilən məlumata görə, etirazçıların sayı təxminən 400 nəfər olub.
Bu, üçüncü belə aksiyadır. İlk belə marşı İrəvanda 2013-cü il noyabr 5-də təşkil edilib. Aksiyanın təşkilatçısı Şant Harutyunyan xuliqanlıq maddəsi ilə 6 il, onun 12 məsləkdaşı isə 1 ildən 7 ilədək müddətə həbs cəzasına məhkum edilib.
Bu dəfəki yürüşü Şant Harutyunyanın 16 yaşlı oğlu Şahen idarə edib. Yürüş iştirakçıları “Azad, müstəqil Ermənistan” və “Ermənistanda siyasi məhbus olmamalıdır” çağırışları ilə İrəvanın mərkəzi prospekti ilə hökumət binası istiqamətində hərəkət ediblər. Burada etirazçılar mövcud hakimiyyətin, prezident Serj Sarkisyanın istefası tələblərini səsləndiriblər. Onlar Sarkisyana “qırmızı kart“ göstərib.
Yürüş zamanı hər hansı insident yaşanmayıb. Məlumatlarda bildirilir ki, polis yalnız izdihamın Milli Təhlükəsizlik Xidməti (MTX) istiqamətində hərəkətinə mane olub. Təşkilatçılar Ermənistan MTX-ni ölkədə “Sovet “KQB”-si qaydalarını tətbiq etməkdə” günahlandırıblar: “Biz özbaşınalığın aradan qaldırılmasına nail olacağıq. Biz həqiqətən azad, müstəqil, suveren Ermənistan yaradacağıq. Bizim ölkədə görüləcək işləri “KQB” həll etməyəcək. Bu ölkə Putinin qərarı ilə idarə olunmayacaq”.
Yürüş Azadlıq meydanında başa çatıb.
