“Güney Azərbaycandakı aksiyaların bundan sonra da güclü şəkildə davam edəcəyi ehtimalı azdır. Lakin bu aksiyalar İranda və dünyada Azərbaycan türklərinin varlığını görmək istəməyənlərə, onların milli varlığını dananlara bir sillədir”.

Bunu Publika.az-a açıqlamasında politoloq Sədrəddin Soltan deyib.

Onun sözlərinə görə, bu aksiyalar eyni zamanda İranda əsas gücün Azərbaycan türkləri olduğunun göstəricisidir: “Bu aksiya milli haqların təmin edilməsi tələbi ilə deyil, Azərbaycan türklərinin milli varlıqlarını fars şovinizmindən qorumasına xidmət edir. Bu baxımdan məsələni başqa yerə yozmağa ehtiyac görmürəm. Çünki bu kimi aksiyalar Azərbaycan türklərinin İran mərkəzli fars düşüncə sisteminə qarşıdır. İranın adı İran İslam Respublikası deyil, lap ən demokratik İran Respublikası olsa belə, türklərin haqqı təmin olunmadığı halda və onlara qarşı bu kimi aşağılayıcı təbliğat aparılana qədər vəziyyət belə gərgin olacaq. Çünki Tehranın elə davranışı türkləri özündən ayırmağa xidmət edir”.

Politoloq qeyd edib ki, XX əsrdə türklərin bütün yenilikçi hərəkatı son nəticədə fars şovinizminin xeyrinə olub: “Elə 1979-cu il inqilabında əsas hərəkətverici qüvvə türklər idi. Ancaq son nəticədə indiki hakimiyyət də Rza şahdan qalma çürük milli ideoloji xətti davam etdirdi. Türkləri təhqirə qarşı aksiyalar 2006-cı il mayın 22-də keçiriblər. O zaman da yenə hərəkat milli haqların təmin olunması tələbi ilə deyil, türklərin milli varlığının fars şovinizminin təbliğatından müdafiə olunmaq məqsədi daşıyırdı”.

S. Soltan bildirib ki, hakimiyyət etdiyi əməldən xəcalət çəkməkdənsə, yenə aksiyada fəal iştirak edənləri tutacaq, onlara işgəncə verəcək.

“Bu, Azərbaycan türklərinin milli özünü dərkinə xidmətdə yardımçı elementlərdən ola bilər. Odur ki bu aksiyanın tez və böyük nəticə verəcəyini ummaq və ona bu sayaq yanaşmaq sadəlövhlük olar”, – deyə o, diqqətə çatdırıb.