Avstriya məhkəməsi sabiq MTN naziri Eldar Mahmudovun məhkəməyə çağırılması və sorğu-sual edilməsi ilə bağlı sorğu göndərib.
Avropa.info haqqin.az saytına istinadən xəbər verir ki, sorğu hələ keçən il göndərilib, lakin bu günədək cavabsız qalıb.
Eldar Mahmudovun adı manat əsginasların çapı ilə məşğul olan Avstriyanın OeBS şəirkətinin işində hallanır. İttiham tərəfinin iddiasına görə, Mərkəzi Bankın bir qrup məmuru şirkətlə bağlanmış müqavilənin 20%-nii rüşvət şəklində geri alıb.
Qalmaqallı məhkəmə prosesi zamanı OeBS-in ittiham olunan yüksək vəzifəli əməkdaşlarından birinin vəkili o dövrdə MTN naziri vəzifəsini tutan Eldar Mahmudovun məhkəmədə ifadə verməsini tələb etmişdi.
Vəkil Qeorq Zanqer iddia edirdi ki, hərtərəfli istintaqın aparılması üçün Azərbaycanın yüksəkvəzifəli məmurlarının ifadə verməsi şərtdir. Öz iddiasını əsaslandırmaq üçün bəyan edib ki, məxfi rüşvət əməliyyatlarında adı keçən azərbaycanlı rəsmilər pulu milli təhlükəsizlik orqanının əməkdaşlarına yönəldə bilərdilər.
Məhkəmə vəkilin vəsatətini təmin edib, Eldara Mahmudova məhkəməyə çağırış vərəqəsi göndərib. Rəsmi Bakı isə bildirişə reaksiya verməyib.
Məhkəmə prosesi zamanı prokuror Volker Şakman bəyan edib ki, Eldar Mahmudovu və digər azərbaycanlı məmurları məhkəməyə cəlb etmək üçün beynəlxalq arbitraj məhkəmələrinə müraciət edəcək.
Prokuror həmçinin Eldar Mahmudov və Mərkəzi Bankın məmurları ilə bağlı məsələni həll etmək üçün Avstriya XİN-ə müraciət göndərib. Avstriya tərəfinin bütün səylərinə baxmayaraq, sabiq milli təhlükəsizlik nazirini məhkəmə prosesinə cəlb etmək mümkün olmayıb.
OeBS-in marketinq üzrə keçmiş direktoru Raluça Tanasesku öz ifadəsində qeyd edib ki, Avstriyanın Federal prokurorluğu rüşvətlə bağlı korrupsiya araşdırmasına başlamışdı və MTN Azərbaycan Mərkəzi Bankının xəzinədarlıq departamentinin müdir müavinini həbs etmişdi. Həbs olunan şəxsi 48 saat həbsdə saxlayıblar. Yalnız 200 min avro rüşvət verdikdən sonra MTN onu azadlığa buraxmağa razı olub.
