Aqil Səmədbəyli: “Onların Rusiyaya sərt təpgi göstərməsi vacibdir”
Rusiyanın Suriyada türkmənlərin məskunlaşdığı əraziləri bombarduman etməsi Türkiyənin sərt təpgisinə səbəb olub. Belə ki, baş verənlərə etiraz əlaməti olaraq rəsmi Ankara Kremlə nota verib.
Maraqlıdır, bir türk dövləti olaraq Azərbaycan da Suriyada türkmənlərin məhv edilməsinə etiraz əlaməti olaraq rəsmi mövqe sərgiləməlidirmi?
Məsələ ilə bağlı Moderator.az-a açıqlama verən tanınmış ictimai-siyasi xadim Aqil Səmədbəyli yalnız Azərbaycanın deyil, bütün türk dövlətlərinin bu məsələdə öz etirazını ortaya qoymasının zəruri olduğunu vurğuladı:
“Azərbaycan Suriyadakı soydaşlarımızın səsinə Türkiyədən də öncə səs verməliydi – ona görə ki, Qarabağ savaşında biz yalnızlığın nə olduğunu yaşamışıq. Umduğun yerdən dar zamanda yardım gəlməməsi çox dərin və acı izlər buraxır. Bu, həm də bir şərəf məsələsidir. Hər şeyi Türkiyədən gözləmək doğru deyil.
Hər türk dövləti türkmən qardaşlarımıza yardım etməli və hamısı da Rusiyaya sərt təpgi göstərməlidir. Türkiyə üçünsə Suriya türkmənlərinə sahib çıxamaq həm də öz ölkəsinin güvənliyi baxımından son dərəcə əhəmiyyətlidir. Hesab edirəm ki, bu məsələdə Türkiyə həm özü təcili tədbirlər görməli, həm də türk dövlətlərini bu məsələdə mövqe bildirməyə, əməli işə dəvət etməlidir”.
